Ornament

Ornament

Jeréj: Blahoslovén Bóh náš, vsehdá nýňi i prísno i vo víki vikóv. (ášče že ňísť jeréja moľáščasja, načinájem: Molítvami svjatých otéc nášich, Hóspodi Iisúse Christé Bóže náš, pomíluj nás. )

I mý: Amíň.

Sláva Tebí Bože náš, sláva Tebí.

Carjú nebésnyj, uťišiteľu, dúše ístiny, íže vezďí sýj i vsjá ispolňájaj, sokróvišče blahích i žízni podáteľu, priidí i vselísja v ný, i očísti ný ot vsjákija skvérny, i spasí, bláže, dúšy náša.

Svjatýj Bóže, svjatýj krípkij, svjatýj bezsmértnyj, pomíluj nás. (3x)

Sláva Otcú, i Sýnu, i Svjatómu Dúchu.

I nýňi i prísno, i vo víki vikóv, amíň.

Presvjatája Tróice pomíluj nás: Hóspodi, očísti hrichí náša: Vladýko, prostí bezzakónija náša: svjatýj, posití, i iscilí némošči náša, ímene Tvojehó rádi.

Hóspodi, pomíluj. (3x)

Sláva Otcú, i Sýnu, i Svjatómu Dúchu.

I nýňi i prísno, i vo víki vikóv, amíň.

Ótče naš, íže jesí na nebesích, da svjatítsja ímja Tvojé, da priídet cárstvije Tvojé: da búdet vóľa Tvojá, jáko na nebesí i na zemlí. Chľíb náš nasúščnyj dážď nám dnés, i ostávi nám dólhi náša, jákože i mý ostavľájem dolžnikóm nášym: i ne vvedí nás vo iskušénije, no izbávi nás ot lukávaho.

Jeréj: Jáko tvojé jesť cárstvo, i síla, i sláva, Otcá i Sýna, i Svjatáho Dúcha, nýňi, i prísno, i vo víki vikóv.

Amíň.

Hóspodi, pomíluj. (6x)

Hóspodi, pomíluj. (6x)

Sláva Otcú, i Sýnu, i Svjatómu Dúchu.

I nýňi i prísno, i vo víki vikóv, amíň.

Priidíte, poklonímsja carévi nášemu Bóhu.

Priidíte, poklonímsja, Christú, carévi, nášemu Bóhu.

Priidíte, poklonímsja, i pripadém samomú Hóspodu Iisúsu Christú, carévi i Bóhu nášemu.

Psalóm 16

Uslýši, Hóspodi, právdu mojú, vonmí moléniju mojemú, * vnuší molítvu mojú ne vo ustnách ľstívych.

Ot licá Tvojehó suďbá mojá izýdet, * óči mojí da vídita pravotý.

Iskusíl jesí sérdce mojé, positíl jesí nóščiju, * iskusíl mjá jesí, i ne obrítesja vo mňí neprávda.

Jáko da ne vozhlahóľut ustá mojá ďíl čelovíčeskich, * za slovesá ustén Tvojích áz sochraních putí žéstoki.

Soverší stópy mojá vo stezjách Tvojích, * da ne podvížutsja stópy mojá.

Áz vozzvách, jáko uslýšal mjá jesí, Bóže, * priklóni úcho Tvojé mňí i uslýši hlahóly mojá.

Udiví mílosti Tvojá, spasájaj upovájuščyja na Ťá * ot protívjaščichsja desníci Tvojéj.

Sochraní mjá, Hóspodi, jáko zínicu óka, * v króvi krilú Tvojéju pokrýješi mjá ot licá nečestívych, ostrástšich mjá:

vrazí mojí dúšu mojú oderžáša, túk svój zatvoríša; * ustá ích hlahólaša hordýňu.

Izhoňáščiji mjá nýňi obydóša mjá, * óči svojí vozložíša ukloníti na zémľu.

Objáša mjá jáko lév hotóv na lóv * i jáko skímen obitájaj v tájnych.

Voskresní, Hóspodi, predvarí já i zapní ím, * izbávi dúšu mojú ot nečestívaho,

orúžije Tvojé * ot vráh rukí Tvojéja.

Hóspodi, ot málych ot zémli, razďilí já v živoťí ích, * i sokrovénnych Tvójich ispólnisja črévo ích,

nasýtišasja synóv, * i ostáviša ostánki mladéncem svojím.

Áz že právdoju javľúsja licú Tvojemú, * nasýščusja, vnehdá javíti mí sjá slávi Tvojéj.

Psalóm 24

K Tebí, Hóspodi, vozdvihóch dúšu mojú, Bóže mój, * na Ťá upovách, da ne postyžúsja vo vík,

nižé da posmijút mí sjá vrazí mojí, * íbo vsí terpjáščiji Ťá ne postyďátsja.

Da postyďátsja bezzakónnujuščii votščé. * Putí Tvojá, Hóspodi, skaží mí, i stezjám Tvoím naučí mjá.

Nastávi mjá na ístinu Tvojú, i naučí mjá, * jáko Tý jesí Bóh Spás mój, i Tebé terpích vés déň.

Pomjaní ščedróty Tvojá, Hóspodi, * i mílosti Tvojá, jáko ot víka súť.

Hrích júnosti mojejá, i nevíďinija mojehó ne pomjaní, * po mílosti Tvojéj pomjaní mjá Tý, rádi bláhosti Tvojejá, Hóspodi.

Bláh i práv Hospóď, * sehó rádi zakonopoložít sohrišájuščym na putí.

Nastávit krótkija na súd, * naučít krótkija putém Svojím.

Vsí putijé Hospódni mílosť i ístina, * vzyskájuščym zavíta Jehó, i sviďínija Jehó.

Rádi ímene Tvojehó, Hóspodi, * i očísti hrích mój, mnóh bo jésť.

Któ jésť čelovík bojájsja Hóspodá? * Zakonopoložít jemú na putí, jehóže izvóli.

Dušá jehó vo blahích vodvorítsja, * i símja jehó nasľídit zémľu.

Deržáva Hospóď bojáščichsja Jehó, * i zavít Jehó javít ím.

Óči mojí výnu ko Hóspodu, * jáko Tój istórhnet ot síti nózi mojí.

Prízri na mjá i pomíluj mjá, * jáko jedinoród i níšč jésm áz.

Skórbi sérdca mojehó umnóžišasja, * ot núžd mojích izvedí mjá.

Vížď smirénije mojé, i trúd mój, * i ostávi vsjá hrichí mojá.

Vížď vrahí mojá, jáko umnóžišasja, * i nenaviďínijem neprávednym voznenavíďiša mjá.

Sochraní dúšu mojú, i izbávi mjá, * da ne postyžúsja, jáko upovách na Ťá.

Nezlóbiviji i práviji priľipľáchusja mňí, * jáko poterpích Ťá, Hóspodi,

Izbávi, Bóže, Izráiľa * ot vsích skorbéj jehó.

Psalóm 50

Pomíluj mjá, Bóže, po velícij mílosti Tvojéj, * i po mnóžestvu ščedrót Tvojích očísti bezzakónije mojé.

Najpáče omýj mjá ot bezzakónija mojehó, * i ot hrichá mojehó očísti mjá.

Jáko bezzakónije mojé áz znáju * i hrích mój prédo mnóju jésť výnu.

Tebí Jedínomu sohriších, i lukávoje préd Tobóju sotvorích, * jáko da opravdíšisja vo slovesích Tvojích i pobidíši, vnehdá sudíti Tí.

Sé bo v bezzakóniich začát jésm, * i vo hrisích rodí mjá máti mojá.

Sé bo ístinu vozľubíl jesí, * bezvístnaja i tájnaja premúdrosti Tvojejá javíl mí jesí.

Okropíši mjá issópom, i očíščusja, * omýješi mjá, i páče sňíha ubiľúsja.

Slúchu mojemú dási rádosť i vesélije, * vozrádujutsja kósti smirénnyja.

Otvratí licé Tvojé ot hrích mojích, * i vsjá bezzakónija mojá očísti.

Sérdce čísto sozíždi vo mňí, Bóže, * i dúch práv obnoví vo utróbi mojéj.

Ne otvérži mené ot licá Tvojehó, * i Dúcha Tvojehó Svjatáho ne otimí ot mené.

Vozdážď mí rádosť spasénija Tvojehó, * i Dúchom Vladýčnim utverdí mjá.

Naučú bezzakónnyja putém Tvojím, * i nečestíviji k Tebí obraťátsja.

Izbávi mjá ot krovéj, Bóže, Bóže spasénija mojehó, * vozrádujetsja jazýk mój právďi Tvojéj.

Hóspodi, ustňí mojí otvérzeši, * i ustá mojá vozvisťát chvalú Tvojú.

Jáko ášče by voschoťíl jesí žértvy, dál bých ubó, * vsesožžénija ne blahovolíši.

Žértva Bóhu dúch sokrušén, * sérdce sokrušénno i smirénno Bóh ne uničižít.

Ublaží, Hóspodi, blahovolénijem Tvoím Sióna, * i da sozíždutsja sťíny Jerusalímskija.

Tohdá blahovolíši žértvu právdy, voznošénije i vsesožehájemaja: * tohdá vozložát na oltár Tvój telcý.

Sláva, i nýňi:

Allilúia, allilúia, allilúia. Sláva tebí, Bóže. (3x)

Hóspodi, pomíluj. (3x)

Sláva, i nýňi:

Ornament

Allilúija, 105

Ispovídajtesja Hóspodevi, jáko bláh, * jáko vo vík mílosť Jehó.

Któ vozhlahólet síly Hospódní? * Slýšany sotvorít vsjá chvalý Jehó?

Blažéni chraňáščiji súd * i tvorjáščiji právdu vo vsjákoje vrémja.

Pomjaní nás, Hóspodi, vo blahovoléniji ľudéj Tvojích, * posití nás spasénijem Tvoím.

Víďiti vo bláhosti izbránnyja Tvojá, vozveselítisja vo veséliji jazýka Tvojehó, * chvalítisja s dostojánijem Tvojím.

Sohrišíchom so otcý nášimi, * bezzakónnovachom, nepravdováchom.

Otcý náši vo Jehípťi * ne razumíša čudés Tvojích,

ni pomjanúša mnóžestva mílosti Tvojejá * i preohorčíša voschoďášče v Čermnóje móre.

I spasé ích ímene Svojehó rádi, * skazáti sílu Svojú,

i zapretí Čermnómu mórju, i izsjáče, * i nastávi já v bézdňi, jáko v pustýni.

I spasé já iz rukí nenavíďaščich, * i izbávi já iz rukí vrahóv.

Pokrý vodá stužájuščyja ím, * ni jedín ot ních izbýsť.

I vírovaša slovesí Jehó, * i vospíša chvalú Jehó.

Uskoríša, zabýša ďilá Jehó, * ne sterpíša sovíta Jehó

i pochoťíša želániju v pustýni, * i iskusíša Bóha v bezvódňij.

I dadé ím prošénije ích, * poslá sýtosť v dúšy ích.

I prohňívaša Moiséja v stánu, * Aaróna svjatáho Hospódňa.

Otvérzesja zemľá i požré Dathána, * i pokrý na sónmišči Aviróna,

I razžžésja óhň v sónmi ích, * plámeň popalí hríšniki.

I sotvoríša teľcá v Chorívi, * i pokloníšasja istukánnomu,

I izminíša slávu Jehó v podóbije * teľcá jadúščaho travú,

I zabýša Bóha spasájuščaho ích, * sotvóršaho vélija vo Jehípťi,

Čudesá v zemlí Chámovi, * strášnaja v móri Čermňím.

I rečé potrebíti ích, ášče ne bý Moiséj, * izbránnyj Jehó, stál v sokrušéniji pred Ním,

vozvratíti járosť Jehó, * da ne pohubít ích.

I uničižíša zémľu želánnuju, * ne jáša víry slovesí Jehó,

I poroptáša v selénijich svojích, * ne uslýšaša hlása Hospódňa.

I vozdvíže rúku Svojú na ňá, * nizložíti já v pustýni.

I nizložíti símja ích vo jazýcich, * i rastočíti já v straný.

I pričastíšasja Vejeľfehóru, * i sňidóša žértvy mértvych.

I razdražíša Jehó v načinánijich svojích, * i umnóžisja v ních padénije.

I stá Finejés, i umílostivi, i prestá síč. * I vminísja jemú v právdu, v ród i ród do víka.

I prohňívaša Jehó na voďí prerikánija, * i ozlóblen býsť Moiséj ích rádi,

Jáko preohorčíša dúch jehó * i ráznstvova ustnáma svojíma.

Ne potrebíša jazýki, jáže rečé Hospóď ím, * i smisíšasja vo jazýcich, i navykóša ďilóm ích.

I porabótaša istukánnym ích, * i býsť ím v soblázn.

I požróša sýny svojá * i dščéri svojá bisovóm,

i prolijáša króv nepovínnuju, króv synóv svoích i dščeréj, * jáže požróša istukánnym chanaánskim, i ubijéna býsť zemľá ích krovmí,

i oskvernísja v ďíľich ích, * i sobludíša v načinánijich svojích.

I razhňívasja járostiju Hospóď na ľúdi Svojá, * i omerzí dostojánije Svojé,

i predadé já v rúki vrahóv, * i obladáša ími nenavíďaščiji ích.

I stužíša ím vrazí ích, * i smiríšasja pod rukámi ích.

Mnóžiceju izbávi já, tíji že preohorčíša Jehó sovítom svojím * i smiríšasja v bezzakónijich svojích.

I víďi Hospóď, vnehdá skorbíti ím, * vnehdá uslýšaše molénije ích.

I pomjanú zavít Svój, * i raskajásja po mnóžestvu mílosti Svojejá,

i dadé já v ščedróty * pred vsími pľinívšimi já.

Spasí ný, Hóspodi Bóže náš, i soberí ný ot jazýk ispovídatisja ímeni Tvojemú svjatómu, * chvalítisja vo chvaľí Tvojéj.

Blahoslovén Hospóď Bóh Izraílev ot víka i do víka. * I rekút vsí ľúdije: búdi, búdi.

Sláva, i nýňi:

Allilúia, allilúia, allilúia. Sláva tebí, Bóže. (3x)

Hóspodi, pomíluj. (3x) Sláva, i nýňi:

Ornament

Allilúija, 106

Ispovídajtesja Hóspodevi, jáko bláh, * jáko vo vík mílosť Jehó.

Da rekút izbávleniji Hóspodem, * íchže izbávi iz rukí vrahá,

i ot strán sobrá ích, * ot vostók i západ, i sívera, i mórja.

Zabludíša v pustýni bezvódňij, * putí hráda obíteľnaho ne obritóša.

Álčušče i žáždušče, dušá ích v ních isčezé. * I vozzváša ko Hóspodu, vnehdá skorbíti ím, i ot núžd ích izbávi já,

i nastávi já na púť práv, * vníti vo hrád obíteľnyj.

Da ispovíďatsja Hóspodevi mílosti Jehó, * i čudesá Jehó synovóm čelovíčeskim,

jáko nasýtil jésť dúšu tščú * i dúšu álčušču ispólni bláh.

Siďáščyja vo tmí i síni smértňij, * okovánnyja niščetóju i žeľízom,

jáko preohorčíša slovesá Bóžija * i sovít Výšňaho razdražíša.

I smirísja v truďích sérdce ích, * i iznemohóša, i ne bí pomohájaj.

I vozzváša ko Hóspodu, vnehdá skorbíti ím, * i ot núžd ích spasé já,

i izvedé já iz ťmý i síni smértnyja, * i úzy ích rasterzá.

Da ispovíďatsja Hóspodevi mílosti Jehó, * i čudesá Jehó synovóm čelovíčeskim,

jáko sokruší vratá mídnaja * i veréji žeľíznyja slomí.

Vospriját já ot putí bezzakónija ích, * bezzakónij bo rádi svojích smiríšasja.

Vsjákaho brášna vozhnušásja dušá ích, * i priblížišasja do vrát smértnych.

I vozzváša ko Hóspodu, vnehdá skorbíti ím, * i ot núžd ích spasé já,

poslá slóvo Svojé i iscilí já, * i izbávi já ot rastľínij ích.

Da ispovíďatsja Hóspodevi mílosti Jehó, * i čudesá Jehó synovóm čelovíčeskim,

i da požrút Jemú žértvu chvalý, * i da vozvisťát ďila Jehó v rádosti.

Schoďáščiji v móre v korabľách, * tvorjáščiji ďílanija v vodách mnóhich,

tíji víďiša ďilá Hospódňa * i čudesá Jehó vo hlubiňí.

Rečé, i stá dúch búren, * i voznesóšasja vólny jehó,

voschóďat do nebés i nizchóďat do bézdn, * dušá ích v zlých tájaše:

smjatóšasja, podvihóšasja, jáko pijányj, * i vsjá múdrosť ích pohloščená býsť.

I vozzváša ko Hóspodu, vnehdá skorbíti ím, * i ot núžd ích izvedé já,

i poveľí búri, i stá v tišinú, * i umolkóša vólny jehó.

I vozveselíšasja, jáko umolkóša, * i nastávi já v pristánišče choťínija svojehó.

Da ispovíďatsja Hóspodevi mílosti Jehó, * i čudesá Jehó synovóm čelovíčeskim:

da voznesút Jehó v cérkvi ľudsťij * i na sidálišči stárec voschváľat Jehó.

Položíl jésť ríki v pustýňu, * i ischódišča vodnája v žáždu,

zémľu plodonósnuju v slánosť, * ot zlóby živúščich na néj.

Položíl jésť pustýňu vo jezéra vodnája * i zémľu bezvódnuju vo ischódišča vodnája.

I naselí támo álčuščyja, * i sostáviša hrády obíteľny,

i nasíjaša séla, i nasadíša vinohrády, * i sotvoríša plód žíten.

I blahosloví já, i umnóžišasja ziló, * i skotý ích ne umáli.

I umálišasja, * i ozlóbišasja ot skórbi, zól i boľízni.

Izlijásja uničižénije na kňázi ích, * i oblazní já po neprochódňij, a ne po putí.

I pomóže ubóhu ot niščetý * i položí jáko óvcy otéčestvija.

Úzrjat práviji i vozveseľátsja, * i vsjákoje bezzakónije zahradít ustá svojá.

Któ premúdr i sochranít sijá? * I urazumíjut mílosti Hospódni?

Sláva, i nýňi:

Allilúia, allilúia, allilúia. Sláva tebí, Bóže. (3x)

Hóspodi, pomíluj. (3x) Sláva, i nýňi:

Ornament

Písň, psálom Davídu, 107

Hotóvo sérdce mojé, Bóže, hotóvo sérdce mojé: * vospojú i pojú vo slávi mojéj.

Vostáni sláva mojá, * vostáni psaltírju i húsli, vostánu ráno.

Ispovímsja Tebí v ľúdech, Hóspodi, * pojú Tebí vo jazýcich.

Jáko vélija verchú nebés mílosť Tvojá * i do óblak ístina Tvojá.

Voznesísja na nebesá, Bóže, * i po vséj zemlí sláva Tvojá,

jáko da izbávjatsja vozľúblenniji Tvojí: * spasí desníceju Tvojéju i uslýši mjá.

Bóh vozhlahóla vo svjaťím Svojém: voznesúsja i razďiľú Sikímu, * i udóľ selénij razmírju.

Mój jésť Halaád i Mój jésť Manassíj, * i Jefrém zastuplénije hlavý Mojejá, Júda cár mój.

Moáv konób upovánija Mojehó, na Iduméju naložú sapóh Mój: * Mňí inopleménnicy pokoríšasja.

Któ vovedét mjá vo hrád ohraždénijá? * Ilí któ nastávit mjá do Iduméji?

Ne Tý li, Bóže, otrínuvyj nás? * I ne izýdeši, Bóže, v sílach nášich?

Dážď nám pómošč ot skórbi, * i sújetno spasénije čelovíčesko.

O Bózi sotvorím sílu, * i Tój uničižít vrahí náša.

Ornament

V konéc, psalóm Davídu, 108

Bóže, chvalý mojejá * ne premolčí,

jáko ustá hríšniča i ustá ľstívaho na mjá otverzóšasja, * hlahólaša na mjá jazýkom ľstívym,

i slovesý nenavístnymi obydóša mjá, * i brášasja so mnóju túne.

Vmísto jéže ľubíti mjá, obolháchu mjá, * áz že moľáchsja,

i položíša na mjá zlája za bláhaja, * i nénavisť za vozľublénije mojé.

Postávi na nehó hríšnika, * i dijávol da stánet odesnúju jehó.

Vnehdá sudítisja jemú, da izýdet osuždén, * i molítva jehó da búdet v hrích.

Da búdut dníje jehó máli, * i jepískopstvo jehó da priímet ín:

da búdut sýnove jehó síri, * i žená jehó vdová:

dvížuščesja da preseľátsja sýnove jehó i vosprósjat, * da izhnáni búdut iz domóv svojích.

Da vzýščet zaimodávec vsjá, jelíka súť jehó, * i da voschíťat čuždíji trudý jehó.

Da ne búdet jemú zastúpnika, * nižé da búdet uščedrjájaj sirotý jehó.

Da búdut čáda jehó v pohublénije, * v róďi jedínom da potrebítsja ímja jehó.

Da vospomjánetsja bezzakónije otéc jehó pred Hóspodem, * i hrích mátere jehó da ne očístitsja.

Da búdut pred Hóspodem výnu * i da potrebítsja ot zemlí pámjať ích.

Zanéže ne pomjanú sotvoríti mílosť, i pohná čelovíka níšča i ubóha, * i umiléna sérdcem umertvíti.

I vozľubí kľátvu, i priídet jemú, * i ne voschoťí blahoslovénija, i udalítsja ot nehó.

I oblečésja v kľátvu jáko v rízu, i vníde jáko vodá vo utróbu jehó, * i jáko jeléj v kósti jehó.

Da búdet jemú jáko ríza, v ňúže oblačítsja, * i jáko pójas, ímže výnu opojasújetsja.

Sijé ďílo obolhájuščich mjá u Hóspoda * i hlahóľuščich lukávaja na dúšu mojú.

I tý, Hóspodi, Hóspodi, sotvorí so mnóju ímene rádi Tvojehó, * jáko blaha mílosť Tvojá.

Izbávi mjá, jáko níšč i ubóh jésm áz, * i sérdce mojé smjatésja vnútr mené.

Jáko síň, vnehdá uklonítisja jéj, * otjáchsja, strjasóchsja jáko prúzi.

Koľína mojá iznemohósta ot postá, * i plóť mojá izminísja jeléja rádi.

I áz bých ponošénije ím, víďiša mjá, * pokiváša hlavámi svoími.

Pomozí mí, Hóspodi Bóže mój, * i spasí mjá po mílosti Tvojéj,

i da razumíjut, jáko ruká Tvojá sijá, * i Tý, Hóspodi, sotvoríl jesí jú.

Proklenút tíji, i Tý blahoslovíši, * vostajúščiji na mjá da postyďátsja, ráb že Tvój vozveselítsja.

Da oblekútsja obolhájuščiji mjá v sramotú, * i odéždutsja, jáko odéždeju, studóm svojím.

Ispovímsja Hóspodevi ziló ustý mojími, * i posreďí mnóhich voschvaľú Jehó,

jáko predstá odesnúju ubóhaho, * jéže spastí ot hoňáščich dúšu mojú.

Sláva, i nýňi:

Allilúia, allilúia, allilúia. Sláva tebí, Bóže. (3x)

Ornament

Hóspodi, pomíluj. (3x)

Tropár, hlás 6.

Hóspodi, íže presvjatáho Tvojehó Dúcha * v tréťij čás apóstolom Tvojím nizposlávyj: * tohó, blahíj, ne otimí ot nás, ** no obnoví nás moľáščichtisja.

Stích 1: Sérdce čísto sozíždi vo mňí, Bóže, i dúch práv obnoví vo utróbi mojéj.

Hóspodi, íže presvjatáho Tvojehó Dúcha * v tréťij čás apóstolom Tvojím nizposlávyj: * tohó, blahíj, ne otimí ot nás, ** no obnoví nás moľáščichtisja.

Stích 2: Ne otvérži mené ot licá Tvojehó, i Dúcha Tvojehó svjatáho ne otimí ot mené.

Hóspodi, íže presvjatáho Tvojehó Dúcha * v tréťij čás apóstolom Tvojím nizposlávyj: * tohó, blahíj, ne otimí ot nás, ** no obnoví nás moľáščichtisja.

Sláva, i nýňi, Bohoródičen:

Bohoródice, ty jesí lozá ístinnaja, * vozrastívšaja nám plód živóta: * tebí mólimsja: molísja, Vladýčice, * so svjatými apóstoly, * pomílovati dúšy náša.

Hospóď Bóh blahoslovén, blahoslovén Hospóď déň dné, pospišít nám Bóh spasénij nášich, Bóh náš, Bóh jéže spasáti.

Svjatýj Bóže, svjatýj krípkij, svjatýj bezsmértnyj, pomíluj nás. (3x)

Sláva Otcú, i Sýnu, i Svjatómu Dúchu.

I nýňi i prísno, i vo víki vikóv, amíň.

Presvjatája Tróice pomíluj nás: Hóspodi, očísti hrichí náša: Vladýko, prostí bezzakónija náša: svjatýj, posití, i iscilí némošči náša, ímene Tvojehó rádi.

Hóspodi, pomíluj. (3x)

Sláva Otcú, i Sýnu, i Svjatómu Dúchu.

I nýňi i prísno, i vo víki vikóv, amíň.

Ótče naš, íže jesí na nebesích, da svjatítsja ímja Tvojé, da priídet cárstvije Tvojé: da búdet vóľa Tvojá, jáko na nebesí i na zemlí. Chľíb náš nasúščnyj dážď nám dnés, i ostávi nám dólhi náša, jákože i mý ostavľájem dolžnikóm nášym: i ne vvedí nás vo iskušénije, no izbávi nás ot lukávaho.

Jeréj: Jáko tvojé jesť cárstvo, i síla, i sláva, Otcá i Sýna, i Svjatáho Dúcha, nýňi, i prísno, i vo víki vikóv.

Amíň.

Troparí, hlás 8.

Blahoslovén jesí, Christé Bóže náš, * íže premúdry lovcý javléj, nizposláv ím Dúcha svjatáho, * i ťími ulovléj vselénnuju: ** čelovikoľúbče, sláva Tebí.

Sláva:

Jehdá snizšéd jazýki slíja, * razďiľáše jazýki výšňij: * jehdá že óhnennyja jazýki razdajáše, * v sojedinénije vsjá prizvá, ** i sohlásno slávim vsesvjatáho Dúcha.

I nýňi:

Nadéžda i predstáteľstvo i pribížišče christiján, * neoborímaja sťiná, iznemohájuščym pristánišče nebúrnoje, * tý jesí, Bohoródice prečístaja: * no jáko mír spasajúščaja neprestánnoju tvojéju molítvoju, ** pomjaní i nás, ďívo vsepítaja.

Hóspodi, pomíluj. (40x)

Íže na vsjákoje vrémja i na vsjákij čás, na nebesí i na zemlí poklaňájemyj i slávimyj, Bóže blahíj, dolhoterpilívyj i mnohomílostivyj, právednyja ľubjáj, i hríšnyja mílujaj, vsjá zovýj ko spaséniju, obiščánija rádi búduščich bláh: sám, Hóspodi, primí í náša v čás séj molítvy, i isprávi živót náš k zápovidem Tvojím, dúšy náša osvjatí i ťilesá očísti, pomyšlénija isprávi, rázum ucilomúdri i istrézvi, i izbávi nás ot vsjákija skórbi, zól i boľíznej, i ohradí nás svjatými ánhely Tvojími, jáko da opolčénijem ích sobľudájemi i nastavľájemi, dostíhnem v jedínstvo víry, i v rázum neprikosnovénnyja Tvojejá slávy: jáko blahoslovén jesí vo víki vikóv, amíň.

Hóspodi, pomíluj. (3x) Sláva, i nýňi:

Čestňíjšuju Cheruvím i slávňijšuju bez sravnénija Serafím, bez istľínija Bóha Slóva róždšuju súščuju Bohoródicu ťá veličájem.

Ímenem Hóspodnim blahosloví ótče.

Jeréj: Molítvami svjatých otéc nášich, Hóspodi Iisúse Christé Bóže náš, pomíluj nás.

(ášče že ňísť jeréja moľáščasja, hlahólem: Molítvami svjatých otéc nášich, Hóspodi Iisúse Christé Bóže náš, pomíluj nás. )

Lík: Amiň.

Molitva sv. Jefrema:

Jerej: Hóspodi i Vladýko životá mojehó, duch unýnija, nebrežénija, ľubonačálija í prazdnoslóvija otžení ot mené. Poklon dozemnyj.

Duch že cilomúdrija i smirenomúdrija, terpínija í ľubvé dáruj mí nedostójnomu rabú tvojemú. Poklon dozemnyj.

Hóspodi Carjú, dážď mňí zríti mojá sohrišénija i ne osuždáti bráta mojehó, jáko blahoslovén jesí vo víki vikóv, amiň. Poklon dozemnyj.

12 malych poklónov, hlahóľušče na kíjždo poklón:

Bóže, mílostiv búdi mňi hríšnomu.

Bóže, očísti hrichí moja i pomíluj mjá.

Bez čislá sohriších, Hóspodi, prostí mjá.

i páki: Hóspodi i Vladýko životá mojehó, duch unýnija, nebrežénija, ľubonačálija í prazdnoslóvija otžení ot mené. Duch že cilomúdrija i smirenomúdrija, terpínija í ľubvé dáruj mí nedostójnomu rabú tvojemú. Hóspodi Carjú, dážď mňí zríti mojá sohrišénija i ne osuždáti bráta mojehó, jáko blahoslovén jesí vo víki vikóv, amiň. Poklon dozemnyj.

Táže:

Svjatýj Bóže, svjatýj krípkij, svjatýj bezsmértnyj, pomíluj nás. (3x)

Sláva Otcú, i Sýnu, i Svjatómu Dúchu.

I nýňi i prísno, i vo víki vikóv, amíň.

Presvjatája Tróice pomíluj nás: Hóspodi, očísti hrichí náša: Vladýko, prostí bezzakónija náša: svjatýj, posití, i iscilí némošči náša, ímene Tvojehó rádi.

Hóspodi, pomíluj. (3x)

Sláva Otcú, i Sýnu, i Svjatómu Dúchu.

I nýňi i prísno, i vo víki vikóv, amíň.

Ótče naš, íže jesí na nebesích, da svjatítsja ímja Tvojé, da priídet cárstvije Tvojé: da búdet vóľa Tvojá, jáko na nebesí i na zemlí. Chľíb náš nasúščnyj dážď nám dnés, i ostávi nám dólhi náša, jákože i mý ostavľájem dolžnikóm nášym: i ne vvedí nás vo iskušénije, no izbávi nás ot lukávaho.

Jeréj: Jáko tvojé jesť cárstvo, i síla, i sláva, Otcá i Sýna, i Svjatáho Dúcha, nýňi, i prísno, i vo víki vikóv.

Amíň.

Hospodi pomíluj. (12x)

Posém molítvu sijú:

Vladýko Bóže, Ótčé vsederžíteľu, Hóspodi Sýne jedinoródnyj, Isúse Christé, i svjatýj Dúše: jedíno Božestvó, jedína síla, pomíluj mjá hrišnaho, i ímiže vísi sudbámi, spasí mjá nedostójnaho rabá tvojehó, jáko blahoslovén jesí vo víki vikóv, amiň.

Jeréj: Sláva tebi, Christé Bóže, upovánije náše, sláva tebí.

Lík: Sláva Otcú, i Sýnu, i svjatómu Dúchu, i nýňi i prísno, i vo víki vikóv. Amíň. Hóspodi, pomíluj. (3x) Blahosloví.

Jeréj: Christós ístinnyj Bóh náš, molítvami prečístyja svojejá Mátere, prepodóbnych i bohonósnych otéc nášich i vsích svjatých, pomílujet i spasét nás, jáko bláh i čelovikoľúbec.

Lík: Amíň.

Ášče mírjan molítsja, hlahólet tókmo: Čestňíjšuju Cheruvím: Sláva, i nýňi: Hóspodi, pomíluj (3x) Hóspodi, blahosloví. Molítvami svjatých otéc nášich, Hóspodi Iisúse Christé Bóže náš, pomíluj nás. Amíň.

Ornament