Veľká večiereň 8.11.

Jeréj: Blahoslovén Bóh náš, vsehdá nýňi i prísno i vo víki vikóv. (ášče že ňísť jeréja moľáščasja, načinájem: Molítvami svjatých otéc nášich, Hóspodi Iisúse Christé Bóže náš, pomíluj nás.)

I mý: Amíň.

Sláva Tebí Bože náš, sláva Tebí.

Carjú nebésnyj, uťišiteľu, dúše ístiny, íže vezďí sýj i vsjá ispolňájaj, sokróvišče blahích i žízni podáteľu, priidí i vselísja v ný, i očísti ný ot vsjákija skvérny, i spasí, bláže, dúšy náša.

Svjatýj Bóže, svjatýj krípkij, svjatýj bezsmértnyj, pomíluj nás. (3x)

Sláva Otcú, i Sýnu, i Svjatómu Dúchu.

I nýňi i prísno, i vo víki vikóv, amíň.

Presvjatája Tróice pomíluj nás: Hóspodi, očísti hrichí náša: Vladýko, prostí bezzakónija náša: svjatýj, posití, i iscilí némošči náša, ímene Tvojehó rádi.

Hóspodi, pomíluj. (3x)

Sláva Otcú, i Sýnu, i Svjatómu Dúchu.

I nýňi i prísno, i vo víki vikóv, amíň.

Ótče naš, íže jesí na nebesích, da svjatítsja ímja Tvojé, da priídet cárstvije Tvojé: da búdet vóľa Tvojá, jáko na nebesí i na zemlí. Chľíb náš nasúščnyj dážď nám dnés, i ostávi nám dólhi náša, jákože i mý ostavľájem dolžnikóm nášym: i ne vvedí nás vo iskušénije, no izbávi nás ot lukávaho.

Jeréj: Jáko tvojé jesť cárstvo, i síla, i sláva, Otcá i Sýna, i Svjatáho Dúcha, nýňi, i prísno, i vo víki vikóv.

Amíň.

Hóspodi, pomíluj. (6x)

Hóspodi, pomíluj. (6x)

Sláva Otcú, i Sýnu, i Svjatómu Dúchu.

I nýňi i prísno, i vo víki vikóv, amíň.

Priidíte, poklonímsja carévi nášemu Bóhu.

Priidíte, poklonímsja, Christú, carévi, nášemu Bóhu.

Priidíte, poklonímsja, i pripadém samomú Hóspodu Iisúsu Christú, carévi i Bóhu nášemu.

Psalóm 103.

Blahosloví dušé mojá Hóspoda, * Hóspodi Bóže moj, vozvelíčilsja jesí ziló. - Vo ispovídanije i vo veleľípotu obleklsja jesí, * oďijájsja svítom jako rízoju. - Prostirájaj nébo jako kóžu, * pokryvájaj vodámi prevýspreňaja svojá. - Polahájaj óblaki na voschoždénije svojé, * choďáj na krylú vítreňu. - Tvorjáj ánheli svojá dúchi, * i sluhí svojá plámeň óhnennyj. - Osnovájaj zémľu na tvérdi jejá, * ne preklonítsja vo vík víka. - Bézdna, jako ríza oďijánije jejá, * na horách stánut vódy. - Ot zapreščénija tvojehó pobíhnut, * ot hlása hróma tvojehó ubojátsja. - Voschóďat hóry, i nischóďat poľá v místo, * jéže osnovál jesí im. - Preďíl položíl jesí jehóže ne préjdut, * nižé obraťátsja pokrýti zémľu. - Posylájaj istóčniki v débrich, * posreďí hór prójdut vódy. - Napajájut vsja zvíri sélnyja, * ždút onáhri v žáždu svojú. - Na tich ptícy nebésnyja privitájut, * ot sredý kámenija daďát hlás. - Napajáj hóri ot prevýsprennych svojích, * ot plodá ďíl tvojích nasýtitsja zemľá. - Prozjabájaj travú skotóm, * i zlák na slúžbu čelovíkom. - Izvestí chľíb ot zemlí, * i vinó veselít sérdce čelovíka. - Umástiti licé jeléjem, * i chľíb sérdce čelovíka ukripít. - Nasýťatsja drevá poľskaja, kédri livánstiji íchže jesí nasadíl, * támo ptícy vozhňizďátsja - Jerodíjevo žilíšče predvodíteľstvujet ími, * hóry vysókija jelénem, kámeň pribížišče zájacem. - Sotvoríl jesí lúnu vo vremená, * sólnce pozná západ svój. - Položíl jesí ťmu i bysť nóšč, * v néjže prójdut vsi zvírije dubrávniji. - Skýmni rykájuščiji voschítiti, * i vzyskáti ot Bóha píšču sebí. - Vozsijá sólnce i sobrášasja, * i v lóžach svojích ľáhut. - Izýdet čelovík na ďílo svojé, * i na ďílanije svojé do véčera. - Jáko vozvelíčišasja ďilá tvojá Hóspodi, vsja premúdrostiju sotvoríl jesí, * ispólnisja zemľá tvári tvojejá. - Sijé móre velíkoje i prostránnoje, * támo hádi íchže ňísť čislá. - Živótnaja málaja s velíkimi, * támo korablí preplávajut. - Zmíj sej, jehóže sozdál jesí ruhátisja jemú, * vsja k tebí čájut, dáti píšču ím vo blahó vrémja. - Dávšu tebí ím soberút, * otvérzšu tebí rúku vsjáčeskaja ispólňatsja bláhosti. - Otvráščšu že tebí licé vozmjatútsja, * otímeši duch ích i isčéznut, i v pérsť svojú vozvraťátsja. - Pósleši dúcha tvojehó i sozíždutsja, * i obnovíši licé zemlí. - Búdi sláva Hospódňa vo víki, * vozveselítsja Hóspoď o ďíľich svojích. - Prizirajáj na zémľu i tvorjáj ju trajstísja, * prikasajájsja horám i dymjátsja. - Vospojú Hospodévi v živoťí mojém, * pojú Bóhu mojemú dóndeže jesm. - Da usladítsja jemú besidá mojá, * áz že vozveseľúsja o Hóspoďi. - Da isčéznut hríšnicy ot zemlí i bezzakónicy, jákože ne býti im, * blahosloví duše mojá Hóspoda. - Sólnce pozná západ svoj, * položíl jesí ťmu i bysť nóšč. - Jáko vozvelíčišasja ďilá tvojá Hóspodi, * vsja premúdrostiju sotvoríl jesí.

Sláva, i nýňi:

Allilúia, allilúia, allilúia. Sláva tebí, Bóže. (3x)

Jeréj že čtét svitílničnyja molítvy.

Molítva pérvaja.

Hóspodi ščédryj i mílostivyj, dolhoterpilíve i mnohomílostive, vnuší molítvu nášu, i vonmí hlásu molénija nášeho, sotvorí s námi známenije vo bláho, nastávi nás na púť Tvoj, jéže chodíti vo ístinňi Tvojéj. Vozveselí serdcá náša, vo jéže bojátisja ímene Tvojehó svjatáho: zané vélij jesí Tý, i tvorjáj čudesá, Tý jesí Bóh jedín, i ňísť podóben Tebí v bozích, Hóspodi: sílen v mílosti, i bláh v kríposti, vo jéže pomoháti, i uťišáti, i spasáti vsjá upovájuščyja vo ímja svjatóje Tvojé.

Jáko podobájet Tebí vsjákaja sláva, čésť i poklonénije, Otcú, i Sýnu, i svjatómu Dúchu, nýňi i prísno, i vo víki vikóv, amíň.

Molítva vtorája.

Hóspodi, da ne járostiju Tvojéju obličíši nás, nižé hňívom Tvojím nakážeši nás, no sotvorí s námi po mílosti Tvojéj, vračú i iscilíteľu dúš nášich. Nastávi nás ko pristánišču choťínija Tvojehó: prosvití óči serdéc nášich v poznánie Tvojejá ístiny: i dáruj nám próčeje nastojáščaho dné mírnoje i bezhríšnoje, i vsé vrémja životá nášeho, molítvami svjatýja Bohoródicy, i vsích svjatých.

Jáko Tvojá deržáva, i Tvojé jésť cárstvo, i síla, i sláva, Otcá, i Sýna, i svjatáho Dúcha, nýňi i prísno, i vo víki vikóv, amíň.

Molítva trétija.

Hóspodi, Bóže náš, pomjaní nás hríšnych i nepotrébnych ráb Tvojích, vnehdá prizyváti nám svjatóje poklaňájemoje ímja Tvojé, i ne posramí nás ot čájanija mílosti Tvojejá: no dáruj nám, Hóspodi, vsjá jáže ko spaséniju prošénija, i spodóbi nás ľubíti, i bojátisja Tebé ot vsehó sérdca nášeho, i tvoríti vo vsích vóľu Tvojú.

Jáko bláh i čelovikoľúbec Bóh jesí, i Tebí slávu vozsylájem, Otcú, i Sýnu, i svjatómu Dúchu, nýňi i prísno, i vo víki vikóv, amíň.

Molítva četvértaja.

Nemólčnymi písňmi, i neprestánnymi slavoslovléňmi ot svjatých síl vospivájemyj, ispólni ustá náša chvalénija Tvojehó, jéže podáti velíčestvije ímeni Tvojemú svjatómu: i dážď nám učástije, i nasľídije so vsími bojáščimisja Tebé ístinnoju, i chraňáščimi zápovidi Tvojá, molítvami svjatýja Bohoródicy, i vsích svjatých Tvojích.

Jáko podobájet Tebí vsjákaja sláva, čésť i poklonénije, Otcú, i Sýnu, i svjatómu Dúchu, nýňi i prísno, i vo víki vikóv, amíň. Amen.

Molítva pjátaja.

Blahoslovén jesí, Hóspodi Bóže vsederžíteľu, svídyj úm čelovíčeskij, svídyj íchže trébujem, mnóho mnóžaje páče néželi prósim, ilí razumivájem. Sám, čelovikoľúbče carjú, vo vsém blahíj, udovlí nás mnóžestvom ščedrót Tvojích, jéže nepostýdnoju sóvistiju prizyváti svjatóje ímja Tvojé: i ne vvedí nás vo iskušénije, no izbávi nás ot lukávaho, i smotrénijem Tvojím vsé jéže ko póľzi nášej ustrój.

Jáko podobájet Tebí vsjákaja sláva, čésť i poklonénije, Otcú, i Sýnu, i svjatómu Dúchu, nýňi i prísno, i vo víki vikóv, amíň.

Molítva šestája.

Hóspodi, Hóspodi, prečístoju Tvojéju dlániju soderžáj vsjáčeskaja, dolhoterpjáj na vsích nás, i kájajsja o zlóbach nášich, pomjaní ščedróty Tvojá, i mílosť Tvojú, posití ny Tvojéju bláhostiju, i dážď nám izbižáti i próčeje nastojáščaho dné, Tvojéju blahodátiju, ot razlíčnych kóznej lukávaho, i nenavítnu žízň nášu sobľudí blahodátiju vsesvjatáho Tvojehó Dúcha.

Mílostiju i čelovikoľúbijem jedinoródnaho Tvojehó Sýna, s nímže blahoslovén jesí, so vsesvjatým i blahím i životvorjáščim Tvojím Dúchom, nýňi i prísno, i vo víi vikóv, amíň.

Molítva sedmája.

Bóže velíkij i dívnyj, neizrečénnoju bláhostiju i bohátym prómyslom upravľájaj vsjáčeskaja, i mirskája nám blahája darovávyj: i sporučívyj nám obiščánnoje cárstvo, darovánnymi nám blahími: sotvorívyj ný i dné mimošédšuju čásť ot vsjákaho uklonítisja zlá: dáruj nám i próčeje neporóčno soveršíti pred svjatóju slávoju Tvojéju, píti Ťá jedínaho blaháho i čelovikoľubívaho Bóha nášeho.

Jáko Tý jesí Bóh náš, i Tebí slávu vozsylájem, Otcú, i Sýnu, i svjatómu Dúchu, nýňi i prísno, i vo víki vikóv, amíň.

Molítva osmája.

Bóže velíkij i výšnij, jedín imijáj bezsmértije, vo svíťi živýj nepristúpňim, vsjú tvár premúdrostiju sozdávyj, razďilívyj meždú svítom i meždú ťmóju, i sólnce položívyj vo óblasť dné, lunú že i zvízdy vo óblasť nóšči: spodóbivyj nás hríšnych i v nastojáščij čás predvaríti licé Tvojé vo ispovídaniji, i večérneje Tebí slavoslóvije prinestí: sám, čelovikoľúbče, isprávi molítvu nášu jáko kadílo pred Tobóju, i priimí jú v voňú blahouchánija: podážď že nám nastojáščij véčer, i prichoďáščuju nóšč mírnu: oblecý ny orúžijem svíta: izbávi ný ot strácha noščnáho, i vsjákija véšči vo ťmí prechoďáščija: i dážď són, jehóže vo upokojénije némošči nášej darovál jesí, vsjákaho mečtánija dijávoľa svobóden. Jéj, Vladýko blahích podáteľu, da i na lóžach nášich umiľájuščesja, pominájem v noščí ímja Tvojé, i poučénijem Tvojích zápovidej prosviščájemi, v rádosti dušévňij vostánem ko slavoslóviju Tvojejá bláhosti: molítvy i molénija Tvojemú blahoutróbiju prinosjášče, o nášich sohrišénijich, i vsích ľudéj Tvojích, jáže, molítvami svjatýja Bohoródicy, mílostiju posití.

Jáko bláh i čelovikoľúbec Bóh jesí, i Tebí slávu vozsylájem, Otcú, i Sýnu, i svjatómu Dúchu, nýňi i prísno, i vo víki vikóv, amíň.

(Diákon ilí jeréj hlahólet jekténiju sijú. Ášče mirján molítsja, hlahólet tokmó:

Hóspodi, pomíluj. (12x) Sláva, i nýňi:)

Mírom Hóspodu pomólimsja.

Lík: Hóspodi, pomíluj. (na jedínom kójemždo prošéniji)

O svýšňim míri, i spaséniji dúš nášich, Hóspodu pomólimsja.

O míri vsehó míra, blahostojániji svjatých Bóžijich cerkvéj, i sojedinéniji vsích, Hóspodu pomólimsja.

O svjaťím chrámi sém, i s víroju, blahohovínijem, i stráchom bóžijim vchoďáščich v óň, Hóspodu pomólimsja.

O svjaťíjšem vselénsťim Archijeréji nášem (ímja rek), Pápi Rímsťim, Hóspodu pomólimsja.

O preosvjaščénňijšem Archijepískopi i Mitropolíťi nášem Kýr (ímja rék), i o bohoľubívim Jepískopi nášem Kýr (ímja rék), čéstňim presvýterstvi, vo Chrisťí dijákonstvi, o vsém príčťi i ľúdech, Hóspodu pomólimsja.

O bohochranímim naróďi nášem, o prederžáščich vlastéch nášich, i o vsém vójinstvi, Hóspodu pomólimsja.

O hráďi sém (ilí O vési séj, ilí O svjaťíj obíteli séj ), vsjákom hráďi, straňí, i víroju živúščich v ních, Hóspodu pomólimsja.

O blahorastvoréniji vozdúchov, o izobíliji plodóv zemných, i vrémeňich mírnych, Hóspodu pomólimsja.

O plávajuščich, putešéstvujuščich, nedúhujuščich, strážduščich, pľinénnych, i o spaséniji ích, Hóspodu pomólimsja.

O izbávitisja nám ot vsjákija skórbi, hňíva i núždy, Hóspodu pomólimsja.

Zastupí, spasí, pomíluj, i sochraní nás, Bóže, Tvojéju blahodátiju.

Presvjatúju, prečístuju, preblahoslovénnuju, slávnuju Vladýčicu nášu Bohoródicu i prisnoďívu Maríju, so vsími svjatými pomjanúvše, sámi sebé i drúh drúha, i vés živót náš Christú Bóhu predadím.

Lík: Tebí, Hóspodi.

Jeréj: Jáko podobájet Tebí vsjákaja sláva, čésť i poklonénije, Otcú, i Sýnu, i svjatómu Dúchu, nýňi i prísno i vo víki vikóv.

Lík: Amíň.

Kathisma 1.

Psalóm 1.

Blažén múž, íže ne íde na sovít nečestívych i na putí hríšnych ne stá, i na sidálišči hubítelej ne síde, no v zakóňi Hospódni vóľa jehó, i v zakóne Jehó poučítsja dě́ň i nóšč. I búdet jáko drévo nasaždénno prí ischódiščich vód, jéže plód svój dást vo vréma svojé, i líst jehó ne otpadét; i vsjá, jelíka ášče tvorít, uspíjet. Ne táko nečestívii, ne táko: no jáko prách, jehóže vozmetáet vítr ot licá zemlí. Sehó rádi ne voskrésnut nečestíviji na súd, nižé hríšnicy v sovít právednych. Jáko vísť Hospóď púť právednych, i púť nečestívych pohíbnet.

Psalóm 2.

Vskúju šatášasja jazýcy, ľúdije poučíšasja tščétnym? Predstáša cárije zémstiji kňázi sobrášasja vkúpi na Hóspoda na Christá Jehó. Rastórhnem úzy ích otvéržem ot nás ího ích. Živýj na nebesích posmijétsja ím, Hospóď poruhájetsja ím. Tohdá vozhlahólet ním hnívom Svojím járostiju Svojéju smjatét já. Áz že postávlen jésm Cár ot Nehó nad Sijónom, horóju svjatóju Jehó, vozviščájaj poveľínije Hospódne. Hospóď rečé ko Mní: Sýn Mój jesí Tý, Áz dnés rodích Ťá. Prosí ot Mené, dám Tí jazýki dostojánije Tvojé oderžánije Tvojé koncý zemlí. Upaséši já žezlóm žeľíznym, jáko sosúdy skudéľniči sokrušíši já. I nýňi, cárije, razumíjte, nakažítesja vsí suďáščiji zemlí. Rabótajte Hóspodevi so stráchom rádujtesja Jemú trépetom. Priimíte nakazánije, da ne kohdá prohnívaetsja Hospóď, pohíbnete ot putí právednoho, jehdá vozhorítsja vskóri járosť Jehó. Blažéni vsí, nadíjuščijisja Náň.

Psalóm 3.

Hóspodi, čtó sjá umnóžiša stužájuščiji mí Mnózi vostajút na mjá, mnózi hlahóľut duší mojéj: nísť spasénija jemú Bózi jehó. Tý že, Hóspodi, zastúpnik mój jesí, sláva mojá voznosjáj hlavú mojú. Hlásom moím ko Hóspodu vozzvách, uslýša mjá ot horý svjátyja Svojejá. Áz usnúch spách; vostách, jáko Hospóď zastúpit mjá. Ne ubojúsja ot tém ľudéj, ókrest napádajuščich na mja. Voskresní, Hóspodi, spási mjá, Bóže mój; jáko Tý porazíl jesí vsjá vraždújuščyja mí vsúje, zúby hríšnikov sokrušíl jesí. Hospódne jésť spasénije, na ľúdech Tvojích blahoslovénije Tvojé.

Sláva, i nýňi:

Allilúia, allilúia, allilúia. Sláva tebí, Bóže. (3x)

(Diákon ilí jeréj hlahólet jekténiju sijú. Ášče mirján molítsja, hlahólet tokmó:

Hóspodi, pomíluj. (3x) Sláva, i nýňi:)

Páki i páki, mírom Hóspodu pomólimsja.

Lík: Hóspodi, pomíluj. (na jedínom kójemždo prošéniji)

Zastupí, spasí, pomíluj, i sochraní nás, Bóže, Tvojéju blahodátiju.

Presvjatúju, prečístuju, preblahoslovénnuju, slávnuju Vladýčicu nášu Bohoródicu i prisnoďívu Maríju, so vsími svjatými pomjanúvše, sámi sebé i drúh drúha, i vés živót náš Christú Bóhu predadím.

Lík: Tebí, Hóspodi.

Jeréj: Jáko Tvojá deržáva, i Tvojé jésť cárstvo i síla, i sláva Otcá i Sýna i svjatáho Dúcha, nýňi i prísno i vo víki vikóv.

Lík: Amíň.

Hóspodi, vozzvách:, hlás 4.

Psalóm 140.

Hóspodi, vozvách k tebí uslýši mja, * uslýši mja Hóspodi. * Hóspodi, vozvách k tebí uslýši mja, * voňmí hlásu molénija mojehó, * vnehdá vozváti mi k tebí, uslýši mja, Hóspodi.**

Da isprávitsja molítva mojá * jáko kadílo préd tobóju: * vozďijánije rukú mojéju, * žértva večérňaja, uslýší mjá Hóspodi.**

Položí Hóspodi chranénije ustóm mojím, * i dvér ohraždénija o ustnách mojích. - Ne ukloní sérdca mojehó v slovesá lukávstvija, * nepščeváti viný o hrisích. - So čelovíki ďílajuščimi bezzakónije, * i ne sočtúsja s izbránnymi ích. - Nakážet mjá právednik mílostiju, i obličít mjá, * jeléj že hríšnaho da ne namástit hlavý mojejá. - Jáko jéšče i molítva mojá v blahovolénijich ích, * požérty býša pri kámeni sudijí ích. - Uslýšatsja hlahóly mojá jáko vozmohóša: * jáko tólšča zemlí prosídesja na zemlí, rastočíšasja kósti ích pri áďi. - Jáko k tebí Hóspodi, Hóspodi óči mojí, * na ťá upovách, ne otimí dušu mojú. - Sochraní mjá ot síti, júže sostáviša mí, * i ot soblázn ďílajuščich bezzakónije. - Pádut vo mréžu svojú hríšnicy, * jedín jésm áz dóndeže prejdú.

Psalóm 141.

Hlásom mojím k Hóspodu vozzvách, * hlasóm mojím ko Hóspodu pomolíchsja. - Prolíju préd ním molénije mojé, * pečáľ mojú préd ním vozviščú. - Vnehdá isčezáti ot mené dúchu mojemú, * i tý poznal jesí stezí mojá. - Na putí sém po nemúže choždách, * skrýša síť mňí. - Smotrjách odesnúju i vozhľadách, * i ne bí znájaj mené. - Pohíbe bíhstvo ot mené, * i ňísť vzyskajáj duší mojejá. - Vozzvách k tebí Hóspodi rích: * tý jesí upovánije mojé, čásť mojá jesí na zemlí žívych. - Voňmí moléniju mojemú, * jáko smiríchsja ziló. - Izbávi mjá ot hoňáščich mjá, * jáko ukripíšasja páče mené.

Stích 10: Izvedí iz temnícy dúšu mojú, ispovídatisja ímeni tvojemú. Stích 9: Mené ždút právednicy, dóndeže vozdási mňi. Stích 8: Iz hlubiný vozvách k tebí Hóspodi, Hóspodi uslýši hlas moj.

Hlás 4. Podóben: jáko dóbľa: Trisólnečnaho Božestvá * predstáteľ svitľijšij Michajíle, javľájasja archistratíže, * s hórnimi sílami zovéši, rádujasja: * svját jesí Ótče, * svját jesí sobeznačáľnoje Slóvo, * svját jesí i svjatýj Dúše, * jedína sláva, * jedíno cárstvo i jestestvó, * jedíno Božestvó i síla.

Stích 7: Da búdut úši tvojí vnémľušči hlásu molénija mojehó.

Trisólnečnaho Božestvá * predstáteľ svitľijšij Michajíle, javľájasja archistratíže, * s hórnimi sílami zovéši, rádujasja: * svját jesí Ótče, * svját jesí sobeznačáľnoje Slóvo, * svját jesí i svjatýj Dúše, * jedína sláva, * jedíno cárstvo i jestestvó, * jedíno Božestvó i síla.

Stích 6: Ašče bezzakónija nazriši Hóspodi, Hóspodi kto postojít, jáko u tebé očiščénije jesť.

I víd tvój óhnen, * i dobróta čúdna, * Michajíle pervoánhele: * neveščéstvennym bo jestestvóm * prechódiši koncý, * ispolňája poveľínija vsích tvorcá, * sílen v kríposti tvojéj poznavájem, * i istóčnik iscilénij chrám tvój soďílovaja, * zvánijem tvojím svjatým počitájemyj.

Stích 5: Imené rádi tvojehó poterpích ťa Hóspodi, poterpí dušá mojá vo slóvo tvojé, upová dušá mojá na Hóspoda.

Tvorjáj ánhely tvojá, * jákože pisásja, dúchi, * i služáščyja tebí plámeň óhnennyj: * posreďí činóv pérvenstvujušča, * pokazál jesí, Hóspodi, tvoích archánheľskich, * Michajíla archistratíha, * tvojím manovénijem povinújuščasja, Slóve, * i písň trisvjatúju * so stráchom vozhlašájušča slávi tvojéj.

Stích 4: Ot stráži útrenija do nóšči, ot stráži útrénija da upovájet Isrájiľ na Hóspoda.

Íny stichíry, hlás 4. Podóben: Dál jesí známenije: Úm predvíčnyj, * svít sostávi vtorýj, * Havrijíla, tebé pričástiji Božéstvennymi * prosviščájuščaho vsjú vselénnuju, * i júže ot víka otkryvájuščaho nám, * Božéstvennuju i velíkuju ístinno tájnu: * vo utróbi voploščáemaho ďívstvenňij, * súšča bezťilésnaho, i bývša čelovíka, * vo jéže spastí čelovíka.

Stích 3: Jáko u Hóspoda mílosť i mnóhoje u ného izbavlénije, i toj izbávit isrájiľa ot vsich bezzakónij jehó.

Úm predvíčnyj, * svít sostávi vtorýj, * Havrijíla, tebé pričástiji Božéstvennymi * prosviščájuščaho vsjú vselénnuju, * i júže ot víka otkryvájuščaho nám, * Božéstvennuju i velíkuju ístinno tájnu: * vo utróbi voploščáemaho ďívstvenňij, * súšča bezťilésnaho, i bývša čelovíka, * vo jéže spastí čelovíka.

Stích 2: Chvalíte Hóspoda vsi jazýcy, pochvalíte jehó vsi ľúdije.

Prestólu predstojá trisólnečnaho Božestvá, * i bohátno osijájem Božéstvennymi svitlosťmí, * ispuščájemymi neprestánno ottúdu, * súščyja na zemlí rádostno likújuščyja, * i blahochváľaščyja ťá, * strastéj mhlý izbávi, * i prosviščénijem ujasní, * Havrijíle archistratíže, * molítvenniče o dušách nášich.

Stích 1: Jáko utverdísja mílosť jehó na nás, i ístina Hospódňa prebyvájet vo vík.

Sokruší svirípstva ahárjanskaja, * na stádo tvojé částo nachoďáščaja: * ustávi razdóry cérkve: * ukrotí búrju bezmírnych iskušénij: * izbávi bíd i obstojánij * ľubóviju čtúščyja ťá * i pod króv tvój pribihájuščyja, * Havrijíle archistratíže, * molítvenniče o dušách nášich.

Sláva, hlás 6.

Vizantíevo: Srádujtesja nám vsjá ánheľskaja činonačálija, pervostojáteľ bo váš, i náš predstáteľ, velíkij archistratíh, v dnéšnij déň, v čestňím jehó chrámi, preslávno javľájasja osvjaščájet. Ťímže po dólhu vospivájušče, tomú vozopijím: pokrýj nás króvom kríl tvojích, veličájšij Michajíle archánhele.

I nýňi, hlás 6.

Srádujtesja nám vsjá ďívstvennych likostojánija, predstáteľnica bo náša, i chodátaica, i pokróv, i velíkoje pribížišče, v dnéšnij déň, v čestňím jejá i Božéstvenňim chrámi, skorbjáščyja uťišájet. Ťímže po dólhu vospivájušče sijú, vozopiím: pokrýj ný Božéstvennym predstáteľstvom tvojím, prečístaja Bohoródice Vladýčice.

Diákon: Premúdrosť, prósti.

Lík: Svíte tíchij, * svjatýja slávy, * bezsmértnaho Otcá nebésnaho, * svjatáho blažénnaho, * Iisúse Christé: * Prišédše sólnca na západ, * víďivše svít večérnij, * pojém Otcá i Sýna i svjatáho Dúcha Bóha. * Dostójin jesí * vo vsja vremená, * pít býti * hlásy prepodóbnými, * Sýne Bóžij, * živót dajáj vsemú míru, * jehóže rádi * vés mír slávit ťa.

Diákon: Vónmim.

Jeréj: Mír vsím.

Diákon: Premúdrosť, vónmim.

V neďiľu večera: Sé nýňi blahoslovíte Hóspoda vsí rabý Hóspodni

Stích: Stojáščiji v chrámi Hóspodni, vo dvórich Bóhu nášeho.

Isúsa Navína čténije.

[Hlavá 5] Býsť jehdá bjáše Isús u Jerichóna, i vozzrív očíma svojíma, víďi čelovíka, stojášča pred ním, i méč jehó obnažén v rucí jehó. I prišéd Isús, rečé jemú: náš li jesí, ilí ot soprotívnych nášich? Ón že rečé jemú: áz archistratíh síly Hospódni, nýňi priidóch símo. I Isús padé licém svojím na zémľu, i rečé jemú: Vladýko, čtó poveľiváješi tvojemú rabú? I rečé archistratíh Hospódeň ko Isúsu: razriší sapóh tvój ot nóh tvojích, místo bo, na némže tý stojíši, svjáto jésť. I sotvorí Isús táko.

Sudéj Izráilevych čténije.

[Hlavá 6] Býsť vo dní óny, ukripísja Madijám na sýny Izráilevy, i tíji vozopíša ko Hóspodu Bóhu: i sé ánhel Hospódeň priíde, i síde pod dúbom, íže vo Jevfráthi, v zemlí Joása, otcá Jezrímova, i Hedeón, sýn jehó, mlaťáše pšenícu na humňí, jéže bižáti s néju ot licá Madijámľa. I javísja jemú ánhel Hospódeň, i rečé k nemú: Hospóď s tobóju, síľnyj krípostiju. I rečé k nemú Hedeón: vo mňí, Hóspodi mój, i ášče jésť Hospóď s námi, i česó rádi obritóša ný vsjá zlája sijá? I hďí súť vsjá čudesá jehó, jelíka povídaša nám otcý náši, hlahóľušče: ne iz Jehípta li izvedé nás Hospóď? I nýňi otvérže ný Hospóď, i predadé ny v rúku madijámľu. I vozzrí na nehó ánhel Hospódeň, i rečé jemú: idí v kríposti tvojéj séj, i spaséši Izráiľa ot rukí madijámli: i sé poslách ťá. I rečé k nemú Hedeón: vo mňí, Hóspodi, v česóm spasú Izráiľa? Sé týsjašča mojá chúždša v Manassíji, i áz jésm mníj v domú otcá mojehó. I rečé k nemú Hospóď: ponéže áz búdu s tobóju, i izbijéši Madijáma, jáko múža jedínaho. I rečé k nemú Hedeón: i ášče obritóch blahodáť pred očíma tvojíma, i da sotvoríši mňí dnés známenije, jáko tý hlahóleši so mnóju, ne otidí otsjúdu, dóndeže priití mňí k tebí, i prinesú žértvu mojú, i požrú pred tobóju. I rečé k nemú ánhel Hospódeň: áz jésm, i premédľu, dóndeže obratíšisja tý. Hedeón že vníde i sotvorí kózlišče ot kóz, i čétverť mukí oprisnókov, i vloží s mjásom v kóšnicu, i juchú vlijá v hornéc, i iznesé k nemú pod dúb, i poklonísja. I rečé k nemú ánhel Hospódeň: vozmí mjasá i chľíby prísnyja, i položí u kámene ónaho, i juchú izlíj: i sotvorí táko. I prostré ánhel Hospódeň konéc žezlá, súščaho v rucí jehó: i kosnésja mjasóm i chľíbom prísnym, i vozhorísja óhň iz kámene, i pojadé mjasá i oprisnóki, i ánhel Hospódeň otíde ot očéj jehó. I víde Hedeón, jáko ánhel jésť Hospódeň: i rečé Hedeón: uvý mňí, Hóspodi, Hóspodi, jáko víďich ánhela Hospódňa licém k licú. I rečé jemú Hospóď: mír tebí, ne bójsja, ne úmreši. I sozdá támo Hedeón žértvennik Hóspodu, i nazvá jehó, mír Hospódeň, dáže do dné sehó.

Proróčestva Isáiina čténije.

[Hlavá 14] Táko hlahólet Hospóď: vsjá zemľá da vopijét s vesélijem. I drevá livánova da vozveseľátsja o tebí, i kédri livánovy rekút: otnéľiže tý usnúl jesí, ne vzýde sikíj nás. Ád dóľi ohorčísja, srítiv tebé, hrjadúšču tí vozdvíže na ťá ispolíny vsjá načáľstvovavšyja zemléju. Ášče vostáli býša ot prestól svojích vsí cárije jazýčestiji, vsí otviščájut, i rekút tebí: i tý pľinén jesí jákože i mý, s námi že pričtálsja jesí. Sníde vo ád sláva tvojá, i mnóhoje tvojé vesélije: pod tobóju postéľut hnílosť, i pokróv tvój čérvi. Káko spadé s nebesé denníca, zaútra vozsijavájuščaja? Sokrušísja na zémľu, posylájaj ko vsím jazýkom. Tý bo rékl jesí v pomyšléniji tvojém: na nébo vzýdu, verchú zvízd nebésnych postávľu prestól mój. I sjádu na horí vysócij, na horách vysókich súščich k síveru. I vzýdu výšše oblakóv, i búdu podóben výšnemu. Nýňi že vo ád snídeši, vo osnovánija zemlí. I víďivšiji ťá počuďátsja, i rekút o tebí: séj čelovík smuščájaj zémľu, potrjasájaj carí: položívyj vselénnuju vsjú pústu, i hrády jejá nizloží, i pľinénnych ne razriší v dómy ích. Vsí cárije jazýčestiji uspóša v čestí, čelovík v domú svojém: tý že otvéržen búdeši v horách, jáko mertvéc vozhnušén so mnóhimi mertvecý, izbodénnymi mečém, nizchoďáščimi vo ád. Ímže óbrazom ríza króviju namočéna, ne búdet čistá, síce nižé tý búdeši číst: zané zémľu mojú pohubíl jesí, i ľúdi mojá porazíl jesí, i ne prebúdeši v víčnoje vrémja.

(Diákon ilí jeréj hlahólet jekténiju sijú. Ášče mirján molítsja, hlahólet tokmó:

Hóspodi, pomíluj. (40x)

Sláva, i nýňi:)

Rcím vsí ot vsejá duší, i ot vsehó pomyšlénija nášeho rcím.

Lík: Hóspodi, pomíluj.

Hóspodi vsederžíteľu, Bóže otéc nášich, mólimtisja, uslýši i pomíluj.

Lík: Hóspodi, pomíluj.

Pomíluj nás, Bóže, po velícij mílosti tvojéj, mólimtisja uslýši i pomíluj.

Lík: Hóspodi, pomíluj. Hóspodi, pomíluj. Hóspodi, pomíluj. (na jedínom kójemždo prošéniji)

Jéšče mólimsja o svjaťíjšem vselénsťim Archijeréji nášem (ímja rék), i o preosvjaščénňijšem Archijepískopi i Mitropolíťi nášem Kýr (ímja rék) i o bohoľubívim Jepískopi nášem Kýr (ímja rék), o služáščich i poslužívšich vo svjaťím chrámi sém, i o otcích nášich duchóvnych, i vséj vo Chrisťí brátiji nášej.

Ješčé mólimsja o bohochranímim naróďi nášem, o prederžáščich vlastéch nášich i o vsém vójinstvi.

Ješčé mólimsja o predstojáščich ľúdech, i ožidájuščich ot tebé velíkija i bohátyja mílosti, za tvorjáščich nám mílostyňu, i za vsjá pravoslávnyja (ilí pravovírnyja) christijány.

Jeréj: Jáko mílostiv i čelovikoľúbec Bóh jesí, i tebí slávu vozsylájem Otcú i Sýnu i svjatómu Dúchu, nýňi i prísno i vo víki vikóv.

Lík: Amíň.

Spodóbi, Hóspodi:

Spodóbi, Hóspodi, vo véčer sej, * bez hrichá sochranitísja nám. - Blahoslovén jesí, Hóspodi, Bóže otéc nášich, * i chváľno i proslávlenno ímja tvojé vo víki, amíň. - Búdi, Hóspodi, mílosť tvojá na nas, * jákože upováchom na ťa. - Blahoslovén jesí, Hóspodi, * naučí nas opravdánijem tvojím. - Blahoslovén jesí, Vladýko, * vrazúmi nas opravdánijem tvojím. - Blahoslovén jesí, Svjatýj, * prosvití nás opravdániji tvojími. - Hóspodi, mílosť tvojá vo vik, * ďíl rukú tvojéju ne prezri. - Tebí podobájet chvalá, * tebí podobájet pínije. - Tebí sláva podobájet * Otcú i Sýnu i svjatómu Dúchu. - Nýňi i prísno, * i vo víki vikóv, amíň.

(Diákon ilí jeréj hlahólet jekténiju sijú. Ášče mirján molítsja, hlahólet tokmó:

Hóspodi, pomíluj. (12x)

Sláva, i nýňi:)

Diákon: Ispólnim večerňuju molítvu nášu Hóspodevi.

Lík: Hóspodi, pomíluj.

Zastupí, spasí, pomíluj i sochraní nás, Bóže, Tvojéju blahodátiju.

Lík: Hóspodi, pomíluj.

Véčera vsehó soveršénna, svjáta, mírna i bezhríšna, u Hóspoda prósim.

Lík: Podáj, Hóspodi. (na jedínom kójemždo prošéniji)

Ánhela mírna, vírna nastávnika, chraníteľa dúš i ťilés nášich, u Hóspoda prósim.

Proščénija i ostavlénija hrichóv, i prehrišénij nášich, u Hóspoda prósim.

Dóbrych i poléznych dušám nášym, i míra mírovi, u Hóspoda prósim.

Próčeje vrémja životá nášeho v míri i pokajániji skončáti, u Hóspoda prósim.

Christijánskija končíny životá nášeho, bezboľíznenny, nepostýdny, mírny, i dóbraho otvíta na strášňim sudíšči Christóvi, prósim.

Presvjatúju, prečístuju, preblahoslovénnuju, slávnuju Vladýčicu nášu Bohoródicu i prisnoďívu Maríju, so vsími svjatými pomjanúvše, samí sebé, i drúh drúha, i vés živót náš Christú Bóhu predadím.

Lík: Tebí, Hóspodi.

Jeréj: Jáko bláh i čelovikoľúbec Bóh jesí, i tebí slávu vozsylájem, Otcú, i Sýnu i svjatómu Dúchu, nýňi i prísno, i vo víki vikóv.

Lík: Amíň.

Jeréj: Mír vsím

Lík: I dúchovi tvojemú.

Diákon: Hlavý váša Hóspodevi prikloníte.

Lík: Tebí, Hóspodi.

Molítva hlavopriklonénija: Hóspodi Bóže naš, priklonívyj nebesá i sošédyj na spasénije róda čelovíčeskaho, prízri na rabý Tvojá, i na dostojánije Tvojé. Tebí bo strášnomu i čelovikoľúbcu sudijí, Tvojí rabí podkloníša hlavý, svojá pokoriša výja, ne ot čelovík ožidájušče pómošči, no Tvojejá naďíjuščesja mílosti, i Tvojehó čájušče spasénija: jáže sochraní na vsjákoje vrémja, i po nastojáščem véčeri, i v prichoďáščuju nošč, ot vsjákaho vrahá, ot vsjákaho protívnaho ďíjstva diávoľskaho, i ot pomyšlénij sújetnych, i vospominánij lukávych.

Jeréj: Búdi deržáva cárstvija Tvojehó blahoslovéna i preproslávlena, Otcá i Sýna, i svjatáho Dúcha, nýňi i prísno, i vo víki vikóv.

Lík: Amíň.

Na litíi stichíry,

hlás 1. Kipriánovo. Úmnych síl archistratízi, predstojášče neprestánno Vladýčňu prestólu, molítesja ko Hóspodu, mír míru darováti, i dušám nášym véliju mílosť.

Arsénijevo. Činonačáľnik výšnich síl, Michaíl pervostojáteľ Božéstvennych činóv, dnés nás k toržestvú sozvá, íže vsehdá s námi choďáj, i sochraňájaj vsjá ot vsjákaho dijávoľa obstojánija. Priidíte úbo prazdnoľúbcy i Christoľúbcy, cvíty dobroďítelej vzémše, čístymi pómysly, i sóvistiju blahostojánnoju, archánhelov sobór počtím: tój bo neprestánno Bóhu predstojá, i trisvjatúju písň vospivája, mólit spastísja dušám nášym.

Hlás 2. Studítovo: Neveščéstvennoje suščestvó, úmnych síl predstáteľstvujušče, i trisólnečnyja slávy blistáňmi, svitodajúšče vselénňij, archistratízi, neprestánnym hlásom trisvjatúju písň vospivájete. Ťímže molítesja, spastísja dušám nášym.

Hlás tójže. Arsénijevo: Neveščéstvennyj prestól okružájušče, úmnaja suščestvá, Božéstvenniji bezťilésniji, trisvjatúju písň pravíteľu Bóhu plámennymi ustnámi pojeté: svjatýj Bóže, Ótče beznačáľnyj. Svjatýj krípkij, Sýne sobeznačáľnyj. Svjatýj bezsmértnyj, jedinosúščnyj Dúše, Otcú i Sýnu sproslavľájemyj.

Anatólija: Bezťilésnymi ustnámi, i úmnymi ustý ánheľstiji číni neprestánnoje pínije prinósjat tvojemú nepristúpnomu Božestvú, Hóspodi, i úmi čístiji i služítelije tvojejá slávy chváľat ťá, Hóspodi, s nímiže Michaíl bezťilésnyj, i Havrijíl, ziló blahoľípňijšij, i pervostojátelije hórnich síl, archistratízi ánheľstiji, učredítelije náši dnés býša: písni písnej poveľivájušče nám píti nepristúpňij slávi tvojéj, čelovikoľúbče, jéjže móľatsja neprestánno za dúšy náša.

Sláva, hlás 4: Óhnennymi ustnámi pojút ťá Cheruvími, Christé Bóže, bezťilésnymi že ustý nemólčno slavoslóvit ťá archánhelskij lík: Michaíl že archistratíh výšnich síl pobídnuju písň neprestánno prinósit slávi tvojéj: tój bo nás dnés ozarí k toržestvú svítlomu, vozbrjacáti dostójňi psalómski chvalú trisvjatúju brénnymi ustnámi, jáko vsjáčeskaja tvojehó chvalénija ispólnišasja, i podajéši míru ťím véliju mílosť.

I nýňi, hlás tójže. Heórhija nikomidíjskaho: Dnés Bohovmistímyj chrám Bohoródica v chrám Hospódeň privóditsja, i Zachárija sijú podjémlet. Dnés svjatája svjatých rádujutsja, i lík ánheľskij táinstvenno toržestvújet. S nímiže i mý, prázdnujušče dnés, s Havrijílom vozopijím: rádujsja, blahodátnaja, Hospóď s tobóju, imíjaj véliju mílosť.

Litijna jekténija:

Svj.: Spasí, Bóže, ľúdi tvojá, i blahosloví dostojánije tvojé, posití mír tvoj mílostiju i ščedrótami, vozvýsi róh christiján pravoslávnych, i nizposlí na ný mílosti tvojá bohátyja, molítvami prečístyja Vladýčicy nášeja Bohoródicy i prisnoďívy Maríji; síloju čestnáho i životvorjáščaho Krestá, zastuplénmi nebésnych Síl bezplótnych, čestnáho i slávnaho proróka, predtéči i krestíteľa Joánna, svjatých slávnych i vsechváľnych Apóstol, i íže vo svjatých Otéc nášich i vseléňskich velíkich učítelej i svjatítelej: Vasílija Velíkaho, Hrihórija Bohoslóva i Joánna Zlatoústaho, Atanásija i Kyrílla, i íže vo svjatých otcá nášeho Nikolája Mýr Lykíjskich čudotvórca, svjatých slavjáňskich Apóstol Kyrílla i Metódija, i svjatáho svjaščenomúčenika Josafáta, svjatých, slávnych i dobropobídnych Múčenik, prepodóbnych i bohonósnych otéc nášich, svjatých i právednych Bohootéc Joakíma i Ánny i prepodobných i bohonósnych otéc nášich Antónija i Teodósija Pečérskich, i svjatáho (jehóže jésť deň ilí chrám), i vsích Svjatých tvojích: mólim Ťa mnohomílostive Hóspodi, uslýši nás hríšnych moľáščichtisja, i pomíluj nás.

Ľ.: Hóspodi pomíluj 12x

Svj.: Jéšče mólimsja o svjaťíšem vselénsťím Archijeréji (ímja rék) Pápi rímsťim, i o bohoľubívim jepískopi nášem Kýr (imjá rek), i o vsečestňíjšem otcí nášem Protoarchimandríťi (ímja rék), Protoihúmeňi (ímja rék), Ihúmeňi (ímja rék), i otcích nášich duchóvnych, i vséj vo Chrisťí brátiji nášej, i o vsjácij duší christijánsťij skorbjáščej i ozlóblenňij, mílosti Bóžija i pómošči trébujuščej: o pokrovéniji svjatáho chráma sehó (obíteli sejá) i živúščich v ném (v néj), o soumiréniji i ustrojéniji vsého míra: o blahostojániji svjatých Bóžijich Cerkvéj, o spaséniji i pómošči, íže so tščánijem i stráchom Bóžijim truždájuščichsja i služáščich otéc i brátij nášich, o póslannych, i vo otšéstviji súščich, o isciléniji v némoščech sležáščich, o pókoj blažénnyja pámjati i ostavléniji hrichóv vsím prežde počívšym otcém i brátijam nášim zďi ležáščym i povsjúdu pravovoslávnym: o izbavléniji pľinénnych, o brátijach nášich vo slúžbach súščich, i o vsích služáščich i poslužívšich vo svjaťím chrámi sém (obíteli séj), rcím vsí.

Ľ.: Kýrije eléjson 12x

Svj.: Uslýši ný, Bóže Spasíteľu náš, upovánije vsích koncéj zemlí, i súščich na móri daléče, i Mílostive, mílostiv búdi nám o hrisích nášich i pomíluj nás: mílostiv bo i čelovikoľúbec Bóh jesí, i tebí slávu vozsylájem, Otcú i Sýnu i Svjatómu Dúchu, nýňi i prísno, i vo víki vikóv. Amíň.

Svj.: † Mír vsím.

Ľ.: I dúchovi tvojému.

Svj.: Hlavý váša Hóspodevi prikloníte.

Ľ.: Tebí Hóspodi.

Svj.: Vladýko mnohomílostive, Hóspodi Isúse Christé Bóže náš, molítvami prečístyja Vladýčicy nášeja Bohoródicy i prisnoďívy Maríji, síloju čestnáho i životvorjáščaho Krestá, zastuplénmi nebésnych Sil bezplótnych, čestnáho i slávnaho proróka, predtéči i krestíteľa Joánna, svjatých slávnych i vsechváľnych Apóstol, svjatých, i dobropobídnych Múčenik, prepodóbnych i bohonósnych otéc nášich, i íže vo svjatých Otéc nášich i vseléňskich velíkich učítelej i svjatítelej: Vasílija Velíkaho, Hrihórija Bohoslóva i Joánna Zlatoústaho, Atanásija i Kyrílla, i íže vo svjatých otcá nášeho Nikolája Mýr Lykíjskich čudotvórca, svjatých slavjáňskich Apóstol Kyrílla i Metódija, i svjatáho svjaščenomúčenika Josafáta, svjatých i právednych Bohootéc Joakíma i Ánny i prepodobných i bohonósnych otéc nášich Antónija i Teodósija Pečérskich i svjatáho (jehóže jésť deň ilí chrám) i vsích Svjatých tvojích: blahoprijátnu sotvorí molítvu nášu, dáruj nám ostavlénije prehrišénij nášich, pokrýj nás króvom krylú tvojéju, otžení ot nás vsjákaho vráha i supostáta, umirí nášu žízň, Hóspodi, pomíluj nás i mír tvój, i spasí dúšy náša, jáko bláh i čelovikoľúbec.

Ľ.: Amíň.

Na stichóvňi stichíry,

hlás 1. Podóben: Nebésnych činóv: Ánheľski v míri toržestvújušče, * súščemu na prestóľi slávy Bóhu siďáščemu * vozopijím písň: * svját jesí Ótče nebésnyj, * svját jesí soprisnosúščnoje Slóvo, * svját jesí i Dúše vsesvjatýj.

Stích: Tvorjáj ánhely svojá dúchi, i sluhí svojá plámeň óhnennyj.

Nebésnym pérvstvuja v derznovéniji mnózim, * i predstojá prestólu strášnomu v slávi, * samovídče neizrečénnych, * spasí ny, Michajíle, archistratíže, * súščyja v núždach bíd i napástej, * molítvami tvojími, mólimsja.

Stích: Chvalíte jehó vsí ánheli jehó, chvalíte jehó vsjá síly jehó.

Bezplótnych ánhelov pérvyj jesí, * i služíteľ Bóžéstvennaho svitozarénija ónaho, * samovídec že i taínnik, * spasí ny, Michajíle archistratíže, * ľítno čtúščyja ťá blahočéstno, * i pojúščyja Tróicu vírno.

Sláva, i nýňi, hlás 8. Joánna monácha: Jáko činonačáľnik i pobórnik, i ánhelov načalovóžď archistratíže, vsjákija núždy i skórbi, nedúhov i ľútych hrichóv svobodí, vírno vospivájuščyja i moľáščyja ťá, slávne, jávi jáko neveščéstven neveščéstvennaho zrjá, i nepristúpnym svítom Vladýčnija slávy osijájem: tój bo čelovikoľúbno plóť nás rádi ot Ďívy priját, spastí voschoťív čelovíčestvo.

Táže:

Nýňi otpuščáješi rabá tvojehó, Vladýko, * po hlahólu tvojemú s mírom. * Jáko víďista oči mojí spasénije tvojé, * jéže jesí uhotovál pred licém vsich ľudéj. * Svít vo otkrovénije jazýkov * i slávu ľudéj tvojích Ísraiľa

Svjatýj Bóže, svjatýj krípkij, svjatýj bezsmértnyj, pomíluj nás. (3x)

Sláva Otcú, i Sýnu, i Svjatómu Dúchu.

I nýňi i prísno, i vo víki vikóv, amíň.

Presvjatája Tróice pomíluj nás: Hóspodi, očísti hrichí náša: Vladýko, prostí bezzakónija náša: svjatýj, posití, i iscilí némošči náša, ímene Tvojehó rádi.

Hóspodi, pomíluj. (3x)

Sláva Otcú, i Sýnu, i Svjatómu Dúchu.

I nýňi i prísno, i vo víki vikóv, amíň.

Ótče naš, íže jesí na nebesích, da svjatítsja ímja Tvojé, da priídet cárstvije Tvojé: da búdet vóľa Tvojá, jáko na nebesí i na zemlí. Chľíb náš nasúščnyj dážď nám dnés, i ostávi nám dólhi náša, jákože i mý ostavľájem dolžnikóm nášym: i ne vvedí nás vo iskušénije, no izbávi nás ot lukávaho.

Jeréj: Jáko tvojé jesť cárstvo, i síla, i sláva, Otcá i Sýna, i Svjatáho Dúcha, nýňi, i prísno, i vo víki vikóv.

Amíň.

Na blahoslovéniji chľíbov Tropár, hlás 4: Nebésnych vójinstv archistratízi, mólim vás prísno mý nedostójniji: da vášimi molítvami ohradité nás króvom kríl neveščéstvennyja vášeja slávy, sochraňájušče ný pripádajuščyja priľížno i vopijúščyja: ot bíd izbávite ný, jáko činonačáľnicy výšnich síl. Dváždy.

I Bohoródice Ďívo: jedínoždy:

Svj.: Hóspodu pomolímsja.

Ľ.: Hóspodi pomíluj.

Svjaščenyk čitať molitvu posvjačiňa litijnych dariv:

Hóspodi Isúse Christé Bóže náš, blahoslovívyj pjať chľíbov, i pjať týsjač naróda nasýtivyj: sám i nýňi, Vladýko, blahosloví chľíby sijá, † pšenícu, vinó, i jeléj, i umnóži já vo hráďi sém, (vési, abo obíteli sej) i vo vsém míri tvojém vsehdá, i ot ních vkušájuščych vírnych tvojích osvjatí. Jáko ty jesí blahoslovjájaj i osvjaščájaj Christé Bóže naš, i tebí slávu vozsylájem, so beznačálnym ti Otcém, i vsesvjatým, i blahím, i životvorjáščym ti Dúchom, nýňi i prísno, i vo víki vikóv.

Ľ.: Amíň.

Ľ.: Búdi imja Hospodne blahoslovénno ot nýňi i do víka. 3x

Psalóm 33.

Blahoslovľú Hóspoda na vsjákoje vremjá, výnu chvála jehó vo usťích mojích. – O Hóspoďi da pochválitsja dušá mojá, da uslýšat krótciji i vozveseľátsja. – Vozvelíčite Hóspoda so mnoju, i voznesém ímja jehó vkúpi. – Vzyskách Hóspoda i uslýša mja, i ot vsich skorbéj mojích izbávi mja. – Pristupíte k nemú i prosvititésja, i licá váša ne postyďátsja. –Sej níščij vozzvá i Hóspoď uslýša í, i ot vsich skorbéj jehó spasé í. –Opolčítsja Ánhel Hóspodeň ókrest bojáščichsja jehó, i izbávit ich. –Vkusíte i vídite, jáko blah Hóspoď, blažén múž iže upovájet naň. –Bójtesja Hóspoda vsi svjatíji jehó, jáko ňísť lišénija bojáščymsja jehó. – Bohátiji obniščáša i vzalkáša, vzyskájuščiji že Hóspoda ne lišátsja vsjákaho blahá.

Sláva i nýňi: Hóspodi pomíluj, Hóspodi pomíluj, Hóspodi pomíluj, blahoslóvi.

Svj.: Blahoslovénije Hóspodne na vas, tohó blahodátiju i čelovikoľúbijem, vsehdá, nýňi i prísno, i vo víki vikóv.

Ľ.: Amíň.

Diákon: Premúdrosť.

Lík: Blahosloví.

Jeréj: Syj blahoslovén Christós Bóh náš, vsehdá, nýňi i prísno, i vo víki vikóv.

Lík: Amíň. Utverdí, Bóže, svjatúju pravoslávnuju (ilí katholíčeskuju) víru, vo víki vikóv.

Jeréj: Presvjatája Bohoródice, spasí nás.

Lík: Čestňíjšuju Cheruvím i slávňijšuju béz sravnénija Serafím, béz istľínija Bóha Slóva róždšuju, súščuju Bóhoródicu ťa veličájem.

Jeréj: Sláva tebi, Christé Bóže, upovánije náše, sláva tebí.

Lík: Sláva Otcú, i Sýnu, i svjatómu Dúchu, i nýňi i prísno, i vo víki vikóv. Amíň. Hóspodi, pomíluj (3x). Blahosloví.

Jeréj: Christós ístinnyj Bóh náš, molítvami prečístyja svojejá Mátere, svjatých slávnych i vsechváľnych apóstol . . . i vsích svjatých, pomílujet i spasét nás, jáko bláh i čelovikoľúbec.

Lík: Amíň.

Ášče mírjan molítsja, hlahólet tókmo: Čestňíjšuju Cheruvím: Sláva, i nýňi: Hóspodi, pomíluj (3x) Hóspodi, blahosloví. Molítvami svjatých otéc nášich, Hóspodi Iisúse Christé Bóže náš, pomíluj nás. Amíň.