Jeréj: Blahoslovén Bóh náš, vsehdá nýňi i prísno i vo víki vikóv. (ášče že ňísť jeréja moľáščasja, načinájem: Molítvami svjatých otéc nášich, Hóspodi Iisúse Christé Bóže náš, pomíluj nás. )
I mý: Amíň.
Sláva Tebí Bože náš, sláva Tebí.
Carjú nebésnyj, uťišiteľu, dúše ístiny, íže vezďí sýj i vsjá ispolňájaj, sokróvišče blahích i žízni podáteľu, priidí i vselísja v ný, i očísti ný ot vsjákija skvérny, i spasí, bláže, dúšy náša.
Svjatýj Bóže, svjatýj krípkij, svjatýj bezsmértnyj, pomíluj nás. (3x)
Sláva Otcú, i Sýnu, i Svjatómu Dúchu.
I nýňi i prísno, i vo víki vikóv, amíň.
Presvjatája Tróice pomíluj nás: Hóspodi, očísti hrichí náša: Vladýko, prostí bezzakónija náša: svjatýj, posití, i iscilí némošči náša, ímene Tvojehó rádi.
Hóspodi, pomíluj. (3x)
Sláva Otcú, i Sýnu, i Svjatómu Dúchu.
I nýňi i prísno, i vo víki vikóv, amíň.
Ótče naš, íže jesí na nebesích, da svjatítsja ímja Tvojé, da priídet cárstvije Tvojé: da búdet vóľa Tvojá, jáko na nebesí i na zemlí. Chľíb náš nasúščnyj dážď nám dnés, i ostávi nám dólhi náša, jákože i mý ostavľájem dolžnikóm nášym: i ne vvedí nás vo iskušénije, no izbávi nás ot lukávaho.
Jeréj: Jáko tvojé jesť cárstvo, i síla, i sláva, Otcá i Sýna, i Svjatáho Dúcha, nýňi, i prísno, i vo víki vikóv.
Amíň.
Hóspodi, pomíluj. (6x)
Hóspodi, pomíluj. (6x)
Sláva Otcú, i Sýnu, i Svjatómu Dúchu.
I nýňi i prísno, i vo víki vikóv, amíň.
Priidíte, poklonímsja carévi nášemu Bóhu.
Priidíte, poklonímsja, Christú, carévi, nášemu Bóhu.
Priidíte, poklonímsja, i pripadém samomú Hóspodu Iisúsu Christú, carévi i Bóhu nášemu.
Psalóm 50.
Pomíluj mja, Bóže, * po velícij mílosti tvojéj. - I po mnóžestvu ščedrót tvojích * očísti bezzakónije mojé. - Najpáče omýj mja ot bezzakónija mojehó, * i ot hrichá mojehó očísti mja. - Jáko bezzakónije mojé az znáju, * i hrich moj predomnóju jesť výnu. - Tebí jedínomu sohriších i lukávoje pred tobóju sotvorích, * jáko da opravdíšisja vo slovesích tvojích, i pobidíši vnehdá sudíti ti. - Se bo v bezzakónijich začát jesm, * i vo hrisích rodí mja máti mojá. - Se bo ístinu vozľubíl jesí: * bezvístnaja i tájnaja premúdrosti tvojejá javíl mi jesí. - Okropíši mja yssópom i očíščusja, * omýješi mja, i páče sňíha obíľusja. - Slúchu mojemú dási rádosť i vesélije, * vozrádujutsja kósti smirénnyja. - Otvratí licé tvojé ot hrich mojích: * i vsja bezzakónija mojá očísti. - Sérdce čísto sozíždi vo mňi, Bóže, * i duch prav obnoví vo utróbi mojéj. - Ne otvérži mené ot licá tvojehó, * i Dúcha tvojehó svjatáho ne ottimí ot mené. - Vozdážď mi rádosť spasénija tvojehó, * i Dúchom vladýčnym utverdí mja. - Naučú bezzakónnyja putém tvojím, * i nečestíviji k tebí obraťátsja. - Izbávi mja ot krovéj, Bóže, Bóže, spasénija mojehó: * vozrádujetsja jazýk moj právďi tvojéj. - Hóspodi ustňí mojí otvérzeši,* i ustá mojá vozvisťát chválu tvojú. - Jáko ašče by voschoťíl jesí žértvy dal bych úbo, * vsesožžénija ne blahovolíši. - Žértva Bóhu duch sokrušén: * sérdca sokrušénna i smirénna Boh ne uničižít. - Ublaží, Hóspodi, blahovolénijem tvojím Sijóna, * i da soziždutsja sťíny Jerusalímskija. Tohdá blahovolíši žértvu právdy, voznošénije i vsesožžehajémaja, * tohdá vozložát na oltár tvoj telcý.
Psalóm 69
Bóže, v pómošč mojú vonmí, * Hóspodi, pomoščí mí potščísja.
Da postyďátsja i posrámjatsja íščuščiji dúšu mojú, * da vozvraťátsja vspjáť i postyďátsja choťáščiji mí zlája.
Da vozvraťátsja ábije styďáščesja, hlahóľuščij mí: * bláhože, bláhože.
Da vozrádujutsja i vozveseľátsja o Tebí vsí íščuščiji Tebé, Bóže, * i da hlahóľut výnu: da vozvelíčitsja Hospóď, ľúbjaščiji spasénije Tvojé:
áz že níšč jésm i ubóh, Bóže, pomozí mí; * pomóščnik mój i izbáviteľ mój jesí Tý, Hóspodi, ne zakosní.
Psalóm 142.
Hóspodi uslýši molítvu mojú, vnuší molénije mojé vo ístiňi tvojéj, * uslýši mjá v právďi tvojéj. - I ne vnídi v súd s rabóm tvojím, * jáko ne opravdítsja préd tobóju vsják živýj. - Jáko pohná vráh dúšu mojú, * smiríl jésť v zémľu živót mój. - Posadíl mjá jésť v témnych, jáko mértvyja víka, * i uný vo mňí dúch mój: vo mňí smjatésja sérdce mojé. - Pomjanúch dní drévnija: poučíchsja vo vsích ďíľich tvojích, * v tvorénijich rukú tvojéju poučáchsja. - Vozďích k tebí rúci mojí, * dušá mojá jáko zémľa bezvódnaja tebí. - Skóro uslýši mjá, Hóspodi, * isčezé dúch mój. - Ne otvratí licá tvojehó ot mené, * i upodóbľusja nizchoďáščym v róv. - Slýšanu sotvorí mňí zaútra mílosť tvojú, * jáko na ťá upovách. - Skaží mňí, Hóspodi, púť, v óň že pojdú, * jáko k tebí vzjách dúšu mojú. - Izmí mjá ot vráh mojích, Hóspodi, k tebí pribihóch,* naučí mjá tvoríti vóľu tvojú, jáko tý jesí Bóh mój. - Dúch tvój blahíj nastávit mjá na zémľu právu, * ímene tvojehó rádi, Hóspodi, živíši mjá právdoju tvojéju. - Izvedéši ot pečáli dúšu mojú, * i mílostiju tvojéju potrebíši vrahí mojá. - I pohubíši vsjá stužájuščyja duší mojéj, * jáko áz ráb tvój jésm.
Uslýši mjá, Hóspodi, v právďi tvojéj, * i ne vnídi v súd s rabóm tvojím.
Uslýši mjá, Hóspodi, v právďi tvojéj, * i ne vnídi v súd s rabóm tvojím.
Dúch tvój blahíj, * nastávit mjá na zémľu právu.
Male slavoslóvije
Sláva vo výšnich Bóhu, i na zemlí mir, * vo čelovícich blahovolénije. Chválim ťa, blahoslovím ťa, * kláňajemtisja, slavoslóvim ťa. - Blahodarím ťa, velikíja rádi slávy tvojejá, * Hóspodi, Cárju nebésnyj. - Bóže Otče vsederžíteľu, Hóspodi, Sýne jedinoródnyj * Isúse Christé, i Svjatýj Dúše, Hóspodi Bóže. - Áhnče Bóžij, * Sýne Otč. - Vzémľaj hrich míra, * pomíluj nas.- Vzémľaj hrichí míra, * prijmí molítvy náša. - Siďáj odesnúju Otcá, * pomíluj nás. - Jáko ty jedín svjat, ty jedín Hóspoď, Isús Christós, vo slávu Bóha Otcá, amíň. - Na vsjak deň blahoslovím ťa, * i voschválim ímja tvojé vo vik, i vo vik víka. - Hóspodi, pribížišče byl jesí nam, vo rod i rod. - Az rich, Hóspodi, pomíluj mja, * i iscilí dúšu mojú, jáko sohriších tebí. - Hóspodi, k tebí pribihóch, naučí mja tvoríti vóľu tvojú, * jáko ty jesí Bóh moj. - Jáko u tebé jesť istóčnik životá, * vo svíťi tvojém úzrim svít. - Probávi mílosť tvojú * víduščym ťa. - Spodóbi, Hóspodi, v nošč sijú, * bez hrichá sochranítisja nám. - Blahoslovén jesí, Hóspodi Bóže Otéc nášich, * i chváľno i proslávlenno ímja tvojé vo víki, amíň. - Búdi, Hóspodi, mílosť tvojá na nás, * jákože upováchom na ťa. - Blahoslovén jesí, Hóspodi, * naučí nás opravdánijem tvojím. - Blahoslovén jesí, Vladýko, * vrazumí nás opravdánijem tvojím. Blahoslovén jesí, Svjatýj, * prosvití nás opravdániji tvojími. - Hóspodi, mílosť tvojá vo vík, * ďil rukú tvojejú ne prézri.- Tebí podobájet chvalá, * tebí podobájet pínije.- Tebí sláva podobájet, * Otcú i Sýnu i Svjatómu Dúchu - I nýňi i prísno,* i vo víki vikóv, amíň.
Víruju vo jedínaho Bóha Otcá, vsederžíteľa, tvorcá nébu i zemlí, vídimym že vsim i nevídimym. I vo jedínaho Hóspoda Iisúsa Christá Sýna Bóžija jedinoródnaho, iže ot Otcá roždénnaho préžde vsich vik. – Svíta ot svíta, Boha ístinna ot Boha ístinna, roždénna, nesotvorénna, jedinosúščna Otcú, ímže vsja býša. – Nas rádi čelovik, i nášeho rádi spasénija sšédšaho s nebés, i voplotívšahosja ot Dúcha svjáta, i Maríji Ďívy, i vočelovíčšasja. – Raspjátaho že za ny pri Pontíjsťim Piláťi, i stradávša i pohrebénna, – i voskrésšaho v tréťij deň po pisánijem. – I vozšédšaho na nebesá, i siďášča odesnúju Otcá, i páki hrjadúščaho so slávoju sudíti živým i mértvym, jehóže cárstviju ne búdet koncá. – I v Dúcha Svjatáho, Hóspoda životvorjáščaho, iže ot Otcá [i Sýna] ischoďáščaho – Iže so Otcém i Sýnom spoklaňájema i soslávima, hlahólavšaho proróki. – Vo jedínu, svjatúju, sobórnuju i apostolskuju Cérkov. – Ispovíduju jedíno kreščénije vo ostavlénije hrichóv. – Čáju voskresénija mértvych. I žízňi búduščaho víka. Amíň.
kanón molébnyj presvjaťíj Bohoródici.
Hlás 6: [Písň 1]
irmós: Pomóščnik i pokrovíteľ býsť mňí vo spasénije, séj mój Bóh, i proslávľu jehó, Bóh otcá mojehó, i voznesú jehó: slávno bo proslávisja.
Pripív: Presvjatája Bohoródice spasí nás.
Ne otríni blahája, ne omerzí mené, ne prézri mené pod tvojé milosérdije čístaja, tépľi pritékšaho: no dážď mí jéže v tebí napitátisja blahodátiju .
Bohoródice blahája, skorbjáščich zastúpnice, prijimí mojé ot duší stenánije: i izbávi mjá ot vsích bezmírnych zól, jáže ľúťi soďíjach.
Sláva: Tebí pripádaju blahája, skórbnych predstáteľnice: izbávi mjá ohňá víčnujuščaho, i ťmý i própasti, vo vsjákom žitijí zľí požívšaho.
I nýňi: Uvý mňí! káko ťá izbáviteľu umoľú Iisúse mój, bezmírno k tebí sohrišív? Próčeje chodátaicu tí prinošáju róždšuju ťá čístuju, pomíluj i spasí mja.
[Písň 3]
irmós: Utverdí Hóspodi, na kámeni zápovidej tvojích podvíhšejesja sérdce mojé, jáko jedín svját jesí i Hospóď.
Pripádaju tí Máti Slóva, prijimí mja ščedrótami tvojími: prosjáščemu že prehrišénij proščénije podážď, téplymi molítvami tvojími.
Pomíluj mjá Vladýčice, pomíluj, i izbávi ot vsjákaho lukávstvija, i ozloblénija bisóv, i víčnaho mučénija.
Sláva: Ukrotí Vladýčice, slastéj mojích hórkoje pijánstvo, trezvénije božéstvennoje mí podajúšči pokajánija, i obraščénije spasíteľnoje.
I nýňi: Vsjáčeskich Hóspoda i soderžíteľa, Bohorodíteľnice, neizhlahólanno róždši, umolí sehó, jéže spastí stádo tvojé.
[Písň 4]
irmós: Uslýša prorók prišéstvije tvojé Hóspodi, i ubojásja, jáko chóščeši ot Ďívy rodítisja, i čelovíkom javítisja i hlahólaše: uslýšach slúch tvój, i ubojáchsja: sláva síľi tvojéj Hóspodi.
Jázvy duší mojejá ne prestajá češú ľuboslásťmi, i priložíšasja mňí strúpov boľízni, i prebyváju nečúvstven i neiscilím: pomíluj Bohorodíteľnice, i iscilí, i spasí mja molítvami tvojími.
Ťmá hrichóvnaja pokrý dúšu mojú Bohorodíteľnice, jáko v noščí síce choždú vo svíťi, ne vídyj Christóvy zápovidi. Svít róždšaja božéstvennyj, pomíluj mjá i prosvití, moľúsja.
Sláva: Slóvo Bóha živáho sníde vo utróbu tvojú Máti Ďívo, i prijém ot tvojích krovéj prečístych vsé mojé smišénije, prichódit suhúb vo jedínoj ipostási, jehóže molí spastí dúšy náša.
I nýňi: Ťilésnaja choťínija priľížno preidóch, i slásti vsjá, i rastľín bých vés, i skvérnen i mérzok: prečístaja Bohorodíteľnice, pomíluj, i spasí mja milosérdijem tvojím.
[Písň 5]
irmós: Ot nóšči útreňujušča, čelovikoľúbče prosvití, moľúsja, i nastávi i mené na poveľínija tvojá, i naučí mja Spáse, tvoríti vóľu tvojú.
Óhň hejénskij sebí razžehóch, ďíja nepodóbnaja, i hňív Bóžij ľúťi privlekóch: pomozí mi čístaja, i ne ostávi mené.
Prehrišénij ostavlénija prosjá prísno, ďíjati ne prestajú prebezzakónnaja, i tebé prečístaja, ohorčeváju: očiščénije vírnych, uščédri mjá.
Sláva: Jehóže ot tvojích krovéj rodilá jesí čístaja, soveršénna čelovíka, i Bóha ístinna Iisúsa, umolí tohó izbávitisja nám ohňá víčnaho.
I nýňi: Dvére neprochodímaja, moľúsja, otvérzi mí dvéri pokajánija ístinnaho, i pokaží mi stezí pokajánija čístaja, jáže vsích nastávnica.
[Písň 6]
irmós: Vozopích vsím sérdcem mojím k ščédromu Bóhu, i uslýša mjá ot áda preispódňaho, i vozvedé ot tlí živót mój.
Vólny nepodóbnych pomyšlénij pohružájut mjá nýňi: no tý Vladýčice, k tíchomu pristánišču nastávi pokajánija ístinnaho tvojím milosérdijem.
Nadéždu i sťínu neoborímuju, i predstáteľnicu tvérdu sťažávše ťá otrokovíce, izbavľájemsja prehrišénij i strastéj ľútych, i vsjákaho vréda.
Sláva: Pripádaju tí čístaja Ďívo, i vopijú s pláčem, Bohoródice: izbávi dúšu mojú okajánnuju búduščaho sudá, i ohňá víčnaho.
I nýňi: Kríposť tý jesí prečístaja, nemoščných dušéju, tvojími moľbámi: ťímže mjá jáko boľášča dušéju ne prézri, no iscilí.
Táže, Hóspodi pomíluj, tríždy.
Sláva, i nýňi:
Sidálen, hlás 6: Za milosérdije ščedrót Christé, sošél jesí na zémľu, i ot Ďívy voplóščsja, vsjá osvjatíl jesí, jáže ot zemlí, i k nebesí vsích prizvál jesí. Ťímže upovájušče na ťá, nikohdáže pohriším, no izbavľájemsja tobóju nastojánij: tý bo jesí Spás náš, sozdáteľu Bóže náš.
[Písň 7]
irmós: Sohrišíchom, bezzakónnovachom, neprávdovachom pred tobóju: nižé sobľudóchom, nižé sotvoríchom, jákože zapovídal jesí nám: no ne predážď nás do koncá, otcév Bóže.
Jehdá dušá okajánnaja mojá ot ťilesé sterpíti chóščet razlučénije, i ne búdet izbavľájaj jú, ilí uťišájaj jú: tohdá Vladýčice predstáni, i izbávi mjá bisóv ozloblénija.
Pripádaju tí, i prinošú sléz téplyja kápli: vím tvojé čelovikoľúbnoje, vím dolhoterpínije i nezlóbije. Tý mja nýňi pomíluj čístaja, prostí i spasí mja.
Sláva: Pomíluj Ďívo, strástnuju i okajánnuju mojú dúšu, vížď strastéj smuščénije, vížď i razhorínije plóti nepostojánnoje: i pómošč dážď mí spasíteľnuju, i izbavlénije.
I nýňi: Otcú jedinosúščnyj, sobeznačáľnyj Sýn i Slóvo, plóť ot tebé priját rávnu, úmnu, i oduševlénnu neprelóžno, jáko vísť sám: i jestestvó náše obnoví v néj lúčše, Ďívo čístaja.
[Písň 8]
irmós: Jehóže vóinstva nebésnaja slávjat, i trepéščut Cheruvími i Serafími, vsjáko dychánije i tvár, pójte, blahoslovíte , i prevoznosíte vo vsjá víki.
Nedoumíju pomyšľája ďijánija mojá, i trepéšču Sudijí strášnaho sudíšča: kíj otvít okajánnyj prinesú tohdá: Vladýčice míra, búdi mí zastúpnica.
Ne otvérži úbo mené samá Vladýčice, ot licá tvojehó, jehdá k tvojemú vozzrjú óbrazu: no mílostiva búdi mí, i nastojáščaho preminí mja osuždénija.
Sláva: Nevísto Bóžija, Maríje beznevístnaja, ot vsjákaho lukávaho vréda izbávi mjá, vopijú tí, tvojehó rabá: i v búduščej prí predstáni mí, jedína christiján predstáteľnice.
I nýňi: Da čelovíki Sýn tvój Vladýčice, obožít, javísja iz tebé soveršén čelovík: sehó úbo molí, soveršénno očíščšasja pokazáti pričástnika mjá božéstvennomu jehó cárstviju.
[Písň 9]
irmós: Jéže rádujsja ot ánhela priímšaja, i róždšaja sozdáteľa tvojehó, Ďívo, spasí ťa veličájuščyja.
Tý jedína predstáteľnice čelovíkov jesí prečístaja, tý jesí sťiná christiján čístaja, ťá nýňi predlaháju ko Christú chodátaicu o mňí smirénnom, da tvojími molítvami pomílujet mjá okajánnaho.
Nóšči ďilá soďílach, i nóšč mučénija chóščet mjá nýňi pokrýti právedno sújetnaho, i vsjáko tomlénije prijáti ádovo: no róždšaja sudijú, i Bóha čístaja Ďívo, izbávi mjá vsjákaho mučénija.
Sláva: Vrémja životá mojehó vo zlých izžích, i k dvérem áda priblížichsja, i vés ne hotóv idú támo: pomozí mi blahája. Bohoródice, na ťá bo nadéždu vozložích.
I nýňi: Blahoľubívaja Vladýčice, ánhelov ukrašénije, múčenikov slávo, s sími pomolísja obristí nám mílosť, i razrišénije dolhóv, i vozmoščí vsím dóbri žízni nášeja tečénije skončáti, božéstvennaja ďíjuščym.
Dostójno jésť jáko voístinu, blažíti Ťá Bohoródicu, prisnoblažénnuju i preneporóčnuju, i Máter Bóha nášeho. Čestňíjšuju Cheruvim i slávňijšuju bez sravnénija Serafim, bez istľínija Bóha Slóva róždšuju, súščuju Bohoródicu Ťá veličájem.
Svjatýj Bóže, svjatýj krípkij, svjatýj bezsmértnyj, pomíluj nás. (3x)
Sláva Otcú, i Sýnu, i Svjatómu Dúchu.
I nýňi i prísno, i vo víki vikóv, amíň.
Presvjatája Tróice pomíluj nás: Hóspodi, očísti hrichí náša: Vladýko, prostí bezzakónija náša: svjatýj, posití, i iscilí némošči náša, ímene Tvojehó rádi.
Hóspodi, pomíluj. (3x)
Sláva Otcú, i Sýnu, i Svjatómu Dúchu.
I nýňi i prísno, i vo víki vikóv, amíň.
Ótče naš, íže jesí na nebesích, da svjatítsja ímja Tvojé, da priídet cárstvije Tvojé: da búdet vóľa Tvojá, jáko na nebesí i na zemlí. Chľíb náš nasúščnyj dážď nám dnés, i ostávi nám dólhi náša, jákože i mý ostavľájem dolžnikóm nášym: i ne vvedí nás vo iskušénije, no izbávi nás ot lukávaho.
Jeréj: Jáko tvojé jesť cárstvo, i síla, i sláva, Otcá i Sýna, i Svjatáho Dúcha, nýňi, i prísno, i vo víki vikóv.
Amíň.
Hlás 4. Bóže otec nášich, tvorjáj prísno s námi po tvojéj krótosti, ne otstávi mílosti tvojejá ot nás, no molítvami ích v míri uprávi živót náš.
Vo vsém míri múčenik tvojích krovmí, jáko bahrjaníceju i víssom, cérkov tvojá ukrasívšisja, ťími vopijét tí Christé Bóže: ľúdem tvojím ščedróty tvojá nizposlí, mír žíteľstvu tvojemú dáruj, i dušám nášym véliju mílosť.
Sláva, hlás 8. So svjatými upokój, Christé, dúšy ráb tvojích, íďíže ňísť boľízň, ni pečáľ, ni vozdychánije, no žízň bezkonéčnaja.
I nýňi: Molítvami, Hóspodi, vsích svjatých i Bohoródicy, tvój mír dážď nám, i pomíluj nás, jáko jedín ščédr.
Hóspodi pomíliuj 40x
Molitva: Íže na vsjákoje vrémja i na vsjákij čas, na nebesí i na zemlí poklaňajemyj i slávimyj, Bóže blahíj, dolhoterpilívyj i mnohomílos-tivyj, právednyja ľubjáj, i hríšnyja mílujaj, vsjá zovýj ko spaséniju, obiščánija rádi búduščich blah: sám, Hóspodi, priimí í náša v čás séj molítvy, i isprávi živót naš, k zápovidem tvojím dúšy náša osvjatí, ťilesa očísti, pomyšlénija isprávi, rázum ucilomúdri, i istrézvi, i izbávi nás ot vsjákija skórbi, zól i boľíznej, i ohradí nas svjatými ánhely tvojími, jáko da opolčénijem ich sobľudájemi í nastavľájemi, dostíhnem v jedínstvo víry, i v rázum neprikosnovénnyja tvojejá slávy: jáko blahoslovén jesí vo víki vikóv, amiň.
Hóspodi pomiluj 3x
Sláva: I nýňi:
Čestňíjšuju Cheruvím i slávňijšuju bez srávnenija Serafím, bez istľínija Bóha Slóva róždšuju súščuju Bohoródicu ťá veličájem.
Ímenem Hóspodnim blahoslovi ótče.
Svj. Bóže, uščédri my, i blahosloví ny, prosvití licé tvojé na ny, í pomíluj ny.
Ľ.: Amiň.
Molítva: Neskvérnaja, nebláznaja, netľínnaja, prečístaja Ďívo, Bohonevísto Vladýčice, Bóha Slóva čelovíkom preslávnym tvojím roždestvóm sojedinívšaja, i odpádšeje jestestvó róda nášeho nebésnym sovokúpľšaja: Nenadéždnych jedína nadéždo, i pobiždájemych pomóščnice, hotóvoje zastuplénije k tebí pribihájuščych, i vsích christiján pribížišče: Ne hnušájsja mené hríšnaho i skvérnaho, skvérnymi pómysly, i slovesý, i ďijáňmi vsehó sebé nepotrébna sotvóršaho, i slastém i unýniju, ľínosti nrávom, rabá bývšaho. No jáko čelovikoľubívaho Bóha Máti, čelovikoľúbňi umilosérdisja o mňí hríšňim i blúdňim, i prijmí mojé ot skvérnych ustén prinosímoje tebí molénije, i tvojehó Sýna, i našého Vladýku i Hóspoda, máternym tvojím derznovénijem objémši, umolí, da otvérzet i mňí čelovikoľúbnoje milosérdije svojejá báhosti, i prezrív mojá bezčíslennaja sohrišénija, obratít mjá na pokajánije, i svojích zápovidej ďílateľa iskúsna javít mjá. Predstáni mňí prísno, jáko mílostivaja, i milosérdaja, i blahoľubívaja, v nastojáščej séj žízni téplaja predstáteľnice i pomóščnice, soprotívnych polkí othoňájušči, i ko spaséniju nastavľájušči mjá: I vo vrémja ischóda mojehó okajánnuju dúšu sobľudájušči, i témnyja óbrazy lukavých bisóv daléče ot nejá otrivájušči: V strášnyj že déň právednaho sudá víčnyja mjá izbavľájušči mukí, i neizrečénnyja slávy tvojehó Sýna i Bóha našehó nasľídnika mjá javľájušči. Júže i da ulučú, Vladýčice mojá presvjatája Bohoródice, tvojehó rádi chodátajstva i zastuplénnija, blahodátiju i čelovikoľúbijem jedinoródnaho Sýna tvojehó, Hóspoda i Bóha i Spása nášeho Isúsa Christá: Jemúže podobájet vsjákaja sláva, čésť i poklonénije, so beznačáľnym jehó otcém, i presvjatým i blahím i životvorjáščim jeho Dúchom, nýňi i prísno i vo víki vikóv Amíň.
Táže: I dážď nám Vladýko, na són hrjadúščym pokój duší, i ťíla i sochraní nás ot mráčnaho sná hrichóvnaho, i ot vsjákaho témnaho sladostrástija. Utiší stremlénija strastéj, uhasí ražžénnyja stríly lukávaho, jáže na ný lukávno dvížimyja, i vostánije plóti nášeja utolí, i vsjákoje zemnóje i véščnoje náše mudrovánije uspí. I dáruj nám Bóže, bódr úm, i cilomúdr pómysl, sérdce trezvjáščejesja, són lehók, i vsjákaho sataniná mečtánija neiskúsen. Vozstávi že nás vo vrémja molítvy, utverždénnych v zápovidech tvojích, i pámjať sudéb tvojích v sebí výnu imúščich. I vsenóščnoje slavoslóvije nám dáruj, vo jéže píti i blahoslovíti i sláviti prečestnóje i velikoľípoje imja tvojé, Otcá, i Sýna, i vsjatáho Dúcha, nýňi i prísno, i vo víki vikóv, amíň.
Preslávnaja prisnoďívo Bohoródice, prijmí molítvy náša, i donesí já Sýnu tvojemú i Bóhu nášemu, da spasét tebé rádi dúši náša.
Upovánije mojé Otéc, pribížišče mojé Sýn, i pokrovíteľ nám jésť Dúch svjatýj, Trójce svjatája, sláva tebí.
Tropár, hlás 6: Pomíluj nás Hóspodi, pomíluj nas: vsjákaho bo otvíta nedoumíjušče, sijú tí molítvu jáko Vladýci hríšniji prinósim: pomíluj nas.
Slava: Hóspodi pomíluj nás, na ťá bo upováchom, ne prohňívajsja na ný zílo, nižé pomjaní bezzakónij nášich, no prízri i nýňi jáko milosérd; i izbávi ný ot vráh nášich; ty bo jesí Bóh náš, i my ľúdije tvojí, vsí ďilá rukú tvojéju, i ímja tvojé prizyvájem.
I nyňi: Milosérdija dvéri otvérzi nám Blahoslovénnaja Bohoródice, naďíjuščiji sja na ťá da ne pohíbnem, no da izbávimsja tobóju ot bíd: ty bo jesí spasénije róda christijánskaho.
Jeréj: Pomíluj nás Bóže po velícij mílosti tvojéj, molimtisja, uslýši i pomíluj.
Ľ.: Hóspodi pomíluj 3x
Jeréj: Ješčé mólimsja o jéže sochranítisja hrádu semú i vsjákomu hrádu, vesí i straňí ot hláda, hubíteľstva, trúsa, potópa, hráda, óhňa, mečá, našéstvuja innopleménnik, i Méžduosóbnyja bráni: i o jéže mílostivu býti, blahouvítlivu i blahopreminíteľnu, bláhomu i čelovikoľubívomu Bóhu nášemu, i otvratíti vés hňív svój na ný dvižáščijsja, i izbáviti nás ot naležáščaho právednaho svojehó preščénija i pomílovati nás.
Hóspodi pomíluj 3x
Jeréj: Uslýši ný Bóže Spasíteľu náš, upovánije vsím koncém zemlí i súščym na móri daléče: i mílostive mílostiv búdi nám o hrisích nášich, i pomíluj nás. Mílostiv bo čelovikoľúbec Bóh jesí, tebí slávu vozsylájem, Otcú i Sýnu, i svjatómu Dúchu, nýňi i prísno i vo víki vikóv amíň.
Jeréj: Sláva tebi, Christé Bóže, upovánije náše, sláva tebí.
Lík: Sláva Otcú, i Sýnu, i svjatómu Dúchu, i nýňi i prísno, i vo víki vikóv. Amíň. Hóspodi, pomíluj. (3x) Blahosloví.
Jeréj: Christós ístinnyj Bóh náš, molítvami prečístyja svojejá Mátere, prepodóbnych i bohonósnych otéc nášich i vsích svjatých, pomílujet i spasét nás, jáko bláh i čelovikoľúbec.
Lík: Amíň.
Ášče mírjan molítsja, hlahólet tókmo: Čestňíjšuju Cheruvím: Sláva, i nýňi: Hóspodi, pomíluj (3x) Hóspodi, blahosloví. Molítvami svjatých otéc nášich, Hóspodi Iisúse Christé Bóže náš, pomíluj nás. Amíň.