Ornament

Ornament

Jeréj: Blahoslovén Bóh náš, vsehdá nýňi i prísno i vo víki vikóv. (ášče že ňísť jeréja moľáščasja, načinájem: Molítvami svjatých otéc nášich, Hóspodi Iisúse Christé Bóže náš, pomíluj nás. )

I mý: Amíň.

Sláva Tebí Bože náš, sláva Tebí.

Carjú nebésnyj, uťišiteľu, dúše ístiny, íže vezďí sýj i vsjá ispolňájaj, sokróvišče blahích i žízni podáteľu, priidí i vselísja v ný, i očísti ný ot vsjákija skvérny, i spasí, bláže, dúšy náša.

Svjatýj Bóže, svjatýj krípkij, svjatýj bezsmértnyj, pomíluj nás. (3x)

Sláva Otcú, i Sýnu, i Svjatómu Dúchu.

I nýňi i prísno, i vo víki vikóv, amíň.

Presvjatája Tróice pomíluj nás: Hóspodi, očísti hrichí náša: Vladýko, prostí bezzakónija náša: svjatýj, posití, i iscilí némošči náša, ímene Tvojehó rádi.

Hóspodi, pomíluj. (3x)

Sláva Otcú, i Sýnu, i Svjatómu Dúchu.

I nýňi i prísno, i vo víki vikóv, amíň.

Ótče naš, íže jesí na nebesích, da svjatítsja ímja Tvojé, da priídet cárstvije Tvojé: da búdet vóľa Tvojá, jáko na nebesí i na zemlí. Chľíb náš nasúščnyj dážď nám dnés, i ostávi nám dólhi náša, jákože i mý ostavľájem dolžnikóm nášym: i ne vvedí nás vo iskušénije, no izbávi nás ot lukávaho.

Jeréj: Jáko tvojé jesť cárstvo, i síla, i sláva, Otcá i Sýna, i Svjatáho Dúcha, nýňi, i prísno, i vo víki vikóv.

Amíň.

Hóspodi, pomíluj. (6x)

Hóspodi, pomíluj. (6x)

Sláva Otcú, i Sýnu, i Svjatómu Dúchu.

I nýňi i prísno, i vo víki vikóv, amíň.

Priidíte, poklonímsja carévi nášemu Bóhu.

Priidíte, poklonímsja, Christú, carévi, nášemu Bóhu.

Priidíte, poklonímsja, i pripadém samomú Hóspodu Iisúsu Christú, carévi i Bóhu nášemu.

Psalóm 53

Bóže, vo ímja Tvojé spasí mjá, * i v síľi Tvojéj sudí mí.

Bóže, uslýši molítvu mojú, * vnuší hlahóly úst mojích.

Jáko čuždíji vostáša na mjá i krípcyji vzyskáša dúšu mojú, * i ne predložíša Bóha préd sobóju.

Sé bo Bóh pomohájet mí, * i Hospóď Zastúpnik duší mojéj.

Otvratít zlája vrahóm mojím, * ístinoju Tvojéju potrebí ích.

Vóleju požrú Tebí, * Ispovímsja ímeni Tvojemú, Hóspodi,

jáko bláho, jáko ot vsjákija pečáli izbávil mjá jesí, * i na vrahí mojá vozzrí óko mojé.

Psalóm 54

Vnuší, Bóže, molítvu mojú * i ne prézri molénija mojehó.

Vonmí mí i uslýši mjá: * vozskorbích pečáliju mojéju i smjatóchsja.

Ot hlása vrážija i ot stužénija hríšniča, * jáko ukloníša na mjá bezzakónije i vo hňívi vraždováchu mí.

Sérdce mojé smjatésja vo mňí * i bojázň smérti napadé na mjá.

Strách i trépet prijíde na mjá * i pokrý mjá ťmá.

I rích: któ dást mí kriľí, jáko holubíňi * i poleščú, i počíjú

Sé udalíchsja bíhaja * i vodvoríchsja v pustýni.

Čájach Bóha, spasájuščaho mjá * ot malodúšija i ot búri.

Potopí, Hóspodi, i razďilí jazýki ích: * jáko víďich bezzakónije i prerikánije vo hráďi.

Dném i nóščiju obýdet i po sťinám jehó. * Bezzakónije i trúd posreďí jehó i neprávda.

I ne oskuďí * ot stóhn jehó lichvá i lésť.

Jáko ášče by vráh ponosíl mí, preterpíl bých úbo, * i ášče bý nenavíďaj mjá na mjá veleríčeval, ukrýl bých sjá ot nehó.

Tý že, čelovíče ravnodúšne, * vladýko mój i znájemyj mój,

íže kúpno naslaždálsja jesí so mnóju brášen, * v domú Bóžiji chodíchom jedinomyšlénijem.

Da prijídet že smérť na ňá, i da snídut vo ád žívi, * jáko lukávstvo v žilíščach ích, posreďí ích.

Áz k Bóhu vozzvách, * i Hospóď uslýša mjá.

Véčer i zaútra, i polúdne povím, * i vozviščú, i uslýšit hlás mój.

Izbávit mírom dúšu mojú ot približájuščichsja mňí, * jáko vo mnózi bjáchu so mnóju.

Uslýšit Bóh i smirít já, Sýj préžde vík. * Ňísť bo ím izminénija, jáko ne ubojášasja Bóha.

Prostré rúku svojú na vozdajánije, * oskverníša zavít Jehó.

Razďilíšasja ot hňíva licá Jehó, i priblížišasja serdcá ích, * umjáknuša slovesá ích páče jeléja, i tá súť stríly.

Vozvérzi na Hóspoda pečáľ tvojú, i Tój ťá prepitájet, * ne dást vo vík molvý právedniku.

Tý že, Bóže, nizvedéši ích vo studenéc istľínija, * múžije krovéj i ľstí ne prepolovját dnéj svoích. Áz že, Hóspodi, upováju na Ťá.

Psalóm 90

Živýj v pómošči Výšňaho, * v króvi Bóha Nebésnaho vodvorítsja.

Rečét Hóspodevi: zastúpnik mój jesí i pribížišče mojé, * Bóh mój, i upováju na Nehó.

Jáko Tój izbávit ťá ot síti lóvči, * i ot slovesé mjatéžna,

pleščmá Svojíma osinít ťá, i pod kriľi Jehó naďíješisja: * orúžijem obýdet ťá ístina Jehó.

Ne ubojíšisja ot strácha noščnáho, * ot strilý leťáščija vo dní,

ot véšči vo ťmí prechoďášija, * ot srjášča, i bísa polúdennaho.

Padét ot strány tvojejá týsjašča, * i ťmá odesnúju tebé, k tebí že ne priblížitsja,

obáče očíma tvojíma smótriši, * i vozdajánije hríšnikov úzriši.

Jáko Tý, Hóspodi, upovánije mojé, * Výšňaho položíl jesí pribížišče Tvojé.

Ne priídet k tebé zló, * i rána ne priblížitsja ťilesí tvojemú,

jáko Ánhelom Svoím zapovísť o tebí, * sochraníti ťá vo vséch putéch tvojích.

Na rukách vózmut ťá, * da ne kohdá pretknéši o kámeň nóhu tvojú,

na áspida i vasilíska nastúpiši, * i poperéši ľvá i zmíja.

Jáko na Mjá upová, i izbávľu í: * pokrýju í, jáko pozná ímja Mojé.

Vozzovét ko Mňí, i uslýšu jehó: * s ním jésm v skórbi, izmú jehó, i proslávľu jehó,

dolhotóju dnéj ispólňu jehó, * i javľú jemú spasénije Mojé.

Sláva, i nýňi:

Allilúia, allilúia, allilúia. Sláva tebí, Bóže. (3x)

Hóspodi, pomíluj. (3x)

Sláva, i nýňi:

Ornament

Psalóm Davídu, k Holiáthu, 143

Blahoslovén Hóspoď Bóh mój, * naučájaj rúci mojí na opolčénije, pérsty mojá na bráň.

Mílosť mojá i pribížišče mojé, * Zastúpnik mój i Izbávitel mój,

Zaščítiteľ mój, i na Nehó upovách: * povinújaj ľúdi mojá pod mjá.

Hóspodi, čtó jésť čelovík, jáko poználsja jesí jemú? * Ili sýn čelovíč, jáko vmiňáješi jehó?

Čelovík sujeťí upodóbisja: * dníje jehó jáko síň prechóďat.

Hóspodi, prikloní nebesá *, i snídi, kosnísja horám, i vozdymjátsja.

Blesní mólniju, i razženéši já, * poslí stríly Tvojá, i smjatéši já.

Poslí rukú Tvojú s vysotý, izmí mjá i izbávi mjá ot vód mnóhich, * iz rukí synóv čúždich,

íchže ustá hlahólaša sujetú, * i desníca ích, desníca neprávdy.

Bóže, písň nóvu vospojú Tebí, * vo psaltíri desjatostrúnňim pojú Tebí,

dajúščemu spasénije carém, * izbavľájušemu Davída, rabá Svojehó, ot mečá ľúta.

Izbávi mjá, i izmí mjá iz rukí synóv čúždich, * íchže ustá hlahólaša sujetú, i desníca ích, desníca neprávdy.

Ichže synove ich jako novosaždenija vodružennaja v junosti svojej. * Dščeri ich udobreny, preukrašeny, jako podobije chrama.

Chranilišča ich ispolnena, otryhajuščaja ot seho v sije, ovcy ich mnohoplodny, * množaščyjasja vo ischodiščach svoich, volove ich tolsti.

Nísť padenija oplotu, nižé prochoda,* nižé voplja v stohnach ich.

Ublažiša ľúdi, ímže sija súť. * Blažéni ľúdije, ímže Hóspoď Bóh ích.

Ornament

Chvalá Davídu 144

Voznesú ťá, Bóže mój, carjú mój, * i blahoslovľú ímja tvojé vo vík i vík víka.

Na vsják déň blahoslovľú ťá, * i voschvaľú ímja tvojé vo vík i vo vík víka.

Vélij Hóspoď i chválen ziló, * i velíčiju jehó ňísť koncá.

Ród i ród voschváľat ďíla tvojá, * i sílu tvojú vozvisťát.

Velikoľípije slávy svjatýni tvojejá vozhlahóľut, * i čudesá tvojá povíďat.

I sílu strášnych tvojích rekút, * i velíčije tvojé povíďať.

Pámjať mnóžestva bláhosti tvojejá otrýhnut * i právdoju tvojéju vozrádujutsja.

Ščédr i mílostiv Hóspoď, * dolhoterpilív i mnohomílostiv.

Bláh Hóspoď vsjáčeskim, * i ščdróty jehó na vsích ďíľich jehó.

Da ispovíďatsja tebí Hóspodi vsjá ďilá tvojá, * i prepodóbnyji tvojí da blahoslovját ťá.

Slávu cárstvija tvojehó rekút * i sílu tvojú vozhlahóľut.

Skazáti sýnovom čelovíčeskim sílu tvojú * i slávu velikoľípija cárstvija tvojehó.

Cárstvo tvojé cárstvo vsích vikóv, * i vladýčestvo tvojé vo vsjákom róďi i róďi.

Víren Hóspoď vo vsích slovesích svojích * i prepodóben vo vsích ďíľich svojích.

Utverždájet Hóspoď vsjá nizpádajuščyja * i vozstavľájet vsjá nizvéržennyja.

Óči vsích na ťá upovájut, * i tý dajéši ím píšču vo blahovrémenniji.

Otverzáješi tý rúku tvojú * i ispoľňáješi vsjáko živótno blahovolénija.

Práveden Hóspoď vo vsích putéch svojích * i prepodóben vo vsích ďiľích svojích.

Blíz Hóspoď vsím prizyvájuščym jehó, * vsím prizyvájuščym jehó vo ístiňi.

Vóľu bojáščychsja jehó sotvorít, * i molítvu ích uslýšit, i spasét já.

Chranít Hóspoď vsjá ľúbjaščyja jehó, * i vsjá hríšniki potrebít.

Chvalú Hóspodňu vozhlahóľut ustá mojá: * i da blahoslovít vsjáka plóť ímja svjatóje jehó vo vík i vo vík víka.

Sláva, i nýňi:

Allilúia, allilúia, allilúia. Sláva tebí, Bóže. (3x)

Hóspodi, pomíluj. (3x) Sláva, i nýňi:

Ornament

Allilúja, Ahhéa i Zachariji, 145

Chvalí duše mojá, Hóspoda: * voschvaľu Hóspoda v živoťí mojém, pojú Bóhu mojemú dóndeže jésm.

Ne naďíjtesja na kňázi, * na sýny čelovíčeskija, v níchže ňísť spasénija.

Izýdet dúch jehó, i vozvratítsja v zémľu svojú: * v tój déň pohíbnut vsjá pomyšlénija jehó.

Blažén, jemúže Bóh Jákovľ pomóščník jehó, * upovánije jehó na Hóspoda Bóha svojehó:

Sotvóršaho nébo i zémľu, móre i vsjá jáže v ních: * Chraňáščaho ístinu v vík:

Tvorjáščaho súd obídimym, dajúščaho píšču álčuščym. * Hóspoď rišít okovánnyja:

Hóspoď umudrjájet sľipcý, * Hóspoď vozvódit nizvéržennyja, Hóspoď ľúbit právedniki.

Hóspoď chranít prišéľcy, síra í vdovú prijímet: * i púť hríšnych pohubít.

Vocarítsja Hóspoď vo vík, * Bóh tvój, Sijóne, v ród i ród.

Ornament

Allilúja, 146

Chvalíte Hóspoda, jáko bláh psalóm. * Bóhovi nášemu da usladítsja chvalénije.

Zíždaj Jerusalíma Hóspoď, * razsíjanija Izráileva soberét.

Isciľájaj sokrušénnyja sérdcem * i objazújaj sokrušénija ích.

Isčitájaj mnóžestvo zvízd * i vsím ím ímena naricájaj.

Vélij Hóspoď náš, i vélija kríposť Jehó, * i rázuma Jehó ňísť čislá,

Prijémľaj krótkija Hóspoď, * smirjájaj že hríšniki do zemlí.

Načníte Hóspodevi vo ispovídaniji, * pójte Bóhovi nášemu v húslech.

Oďivájuščemu nébo óblaki, uhotovľájuščemu zemlí dóžď, * prozjabájuščemu na horách travú i zlák na slúžbu čelovíkom,

dajúščemu skotóm píšču ích, * i ptencém vránovym prizyvájuščym Jehó.

Ne v síľi kónsťij voschóščet, * nižé v lýsťich múžeskich blahovolít.

Blahovolít Hóspoď v bojáščichsja Jehó * i vo upovájuščich na mílosť Jehó.

Ornament

Allilúja, Ahhéa i Zachariji, 147

Pochvalí, Jerusalíme, Hóspoda, * chvalí Bóha Tvojehó, Sijóne,

jáko ukripí verejí vrát Tvojích, * blahosloví sýny tvojá v tebí.

Polahájaj preďíly Tvojá mír,* i túka pšeníčna nasyščájaj ťá.

Posylájaj slóvo Svojé zemlí, * do skórosti tečét slóvo Jehó,

dajúščaho sňíh Svój, jáko vólnu, * mhlú, jáko pépel, posypájuščaho,

metájuščaho hóloť Svój, jáko chľíby: * protívu licá mráza Jehó któ postojít?

Póslet slóvo Svojé, i istájet já, * dchnét dúch Jehó, i potekút vódy.

Vozviščájaj slóvo Svojé Jákovu, * opravdánija i suďbý Svojá Izráilevi.

Ne sotvorí táko vsjákomu jazýku, * i suďbý Svojá ne javí ím.

Sláva, i nýňi:

Allilúia, allilúia, allilúia. Sláva tebí, Bóže. (3x)

Hóspodi, pomíluj. (3x) Sláva, i nýňi:

Ornament

Allilúja, Ahhéa i Zachariji, 148

Chvalíte Hospoda s nebes, * chvalite jeho vo vyšnich.

Chvalíte jehó vsí Ánheli jehó, * chvalíte jehó vsjá síly jehó,

Chvalíte jehó sólnce i luná, * chvalíte jehó vsjá zvízdy i svít.

Chvalíte jehó nebesá nebés, * i vodá jáže prevýše nebés.

Da voschváľat ímja Hóspodne: jáko tój rečé i býša, * tój poveľí i sozdášasja.

Postávi já vo vík i vo vík víka, * poveľínije položí i ne mímo idét.

Chvalíte Hóspoda ot zemlí * zmijéve i vsjá bézdny.

Óhň, hrád, sňíh, hóloť, dúch búren, * tvorjáščaja slóvo jehó.

Hóry i vsí chólmi, * dréva plodonósna i vsí kédry.

Zvírije i vsí skóti, * hádi i ptícy pernáty.

Cáriji zémstiji i vsí ľúdije, * kňázi i vsí sudijí zémstiji.

Júnoši i ďívy, * stárcy s júnotami,

da voschváľat ímja Hóspodne, jáko voznesésja ímja tohó jedínaho: * ispovídanije jehó na zemlí i na nebesí.

I voznesét róh ľudéj svojích: písň vsím prepodóbnym jehó, * synovóm Izrailevym, ľúdem približjuščymsja jemu.

Ornament

Allilúja, 149

Vospójte Hospodévi písň nóvu, * chvalénije jehó v cérkvi prepodóbnych.

Da vozveselítsja Izráiľ o sotvoršém jehó, * i sýnove Sijóni vozrádujutsja o carí svojém.

Da voschváľat ímja jehó v líci, * v tympáňi i psaltíri da pojút jemú.

Jáko blahovolít Hóspoď v ľúdech svojích, * i voznesét krótkija vo spasénije.

Voschváľatsja prepodóbniji vo slávi, * i vozrádujutsja na ložách svojích.

Voznošénija Bóžija v hortáni ích, *i meči obojúdu ostrý v rukách ích.

Sotvoríti otmščénije v jazýcich, * obličénija v ľúdech.

Svjazáti carí ích púty, * i slávnyja ích ručnými okóvy žeľíznymi.

Sotvoríti v ních súd napísan, * sláva sijá búdet vsím prepodóbnym jehó.

Ornament

Allilúja, 150

Chvalíte Bóha vo svjatých jehó, * chvalíte jehó v utverždéniji síly jehó.

Chvalíte jehó na sílach jehó, * chvalíte jehó po mnóžestvu velíčestvija jehó.

Chvalíte jehó v hlási trúbňim, * chvalíte jehó v psaltíri i húsľich.

Chvalíte jehó v tympáňi i líci, * chvalíte jehó v strúnach i orháňi.

Chvalíte jehó v kymváľich dobrohlásnych, chvalíte jehó v kymváľich vosklicánija, * vsjákoje dychánije da chvalít Hóspoda.

Sláva, i nýňi:

Allilúia, allilúia, allilúia. Sláva tebí, Bóže. (3x)

Ornament

Hóspodi, pomíluj. (3x)

Tropár, hlás 2.

Íže v šestýj déň že i čás, na kresťí prihvoždéj, * v rají derznovénnyj Adámov hrích, i sohrišénij nášych rukopisánije razderí, ** Christé Bóže, i spasí nás.

Stích 1: Vnuší, Bóže, molítvu mojú, i ne prézri molénija mojehó.

Íže v šestýj déň že i čás, na kresťí prihvoždéj, * v rají derznovénnyj Adámov hrích, i sohrišénij nášych rukopisánije razderí, ** Christé Bóže, i spasí nás.

Stích 2: Áz k Bóhu vozzvách, i Hóspoď uslýša mjá.

Íže v šestýj déň že i čás, na kresťí prihvoždéj, * v rají derznovénnyj Adámov hrích, i sohrišénij nášych rukopisánije razderí, ** Christé Bóže, i spasí nás.

Sláva, i nýňi, Bohoródičen:

Jáko ne ímamy derznovénija za premnóhija hrichí náša: * ty íže ot tebé róždšahosja molí, Bohoródice Ďívo: * mnóho bo móžet molénije máterneje ko blahosérdiju Vladýki. * Ne prézrí hríšnych moľbý, vsečístaja, * jáko mílostiv jésť í spastí mohíj, * íže i stradáti o nás izvólivyj.

tropár proróčestva, hlás 3: Nesterpímyj jésť Hóspodi, hňív na hríšniki preščénija tvojehó, i ňísmy dostójni vozzríti, i prosíti ot tebé mílosti: da ne járostiju tvojéju, ni hňívom tvojím pohubíši nás, íchže ot zemlí rukóju tvojéju sozdál jesí.

Sláva, i nýňi, tójže: Nesterpímyj jésť Hóspodi, hňív na hríšniki preščénija tvojehó, i ňísmy dostójni vozzríti, i prosíti ot tebé mílosti: da ne járostiju tvojéju, ni hňívom tvojím pohubíši nás, íchže ot zemlí rukóju tvojéju sozdál jesí.

Prokímen, psalóm 121, hlás 4: Dómu rádi Hóspoda Bóha nášeho vzyskách blahája tebí.

Stích: Vozveselíchsja o rékšich mňí: v dóm Hospódeň pójdem.

Proróčestva Isáijina čténije.

[Hlavá 66 st. 10-24.] Veselísja Jerusalíme, i toržestvújte v ném vsí ľúbjaščiji jehó, i živúščiji v ném rádujtesja vkúpi s ním rádostiju, vsí jelícy plákaste o ném, da sséte i nasýtitesja ot soscá uťišénija jehó, da ssávše nasladitésja ot vchóda slávy jehó. Jáko sijá hlahólet Hospóď: sé áz ukloňáju na ňá, áki rikú míra, i áki potók navodňájemyj, slávu jazýkov: ďíti ích na rámena vzjáty búdut, i na koľínu uťíšatsja. jákože ášče kohó máti uťišájet, táko i áz uťíšu vý, i vo Jerusalími uťíšitesja. I úzrite, i vozrádujetsja sérdce váše, i kósti váša jáko travá prozjábnut: i poznájetsja ruká Hospódňa bojáščymsja jehó, i zapretít nepokarjájuščymsja. Sé bo Hospóď, jáko óhň prijídet, i jáko búrja kolesnícy jehó, vozdáti járostiju otmščénije svojé, i preščénije vo plámeni óhnenňi. Ohném bo Hospódnim sudítisja búdet vsjá zemľá, i mečém jehó vsjáka plóť: mnózi jázveni búdut ot Hóspoda. Očiščájuščijisja i osvjaščájuščijisja v vertohráďich, i v preddvérijich jadúščiji mjáso svinóje, i mérzosti, i mýši, vkúpi pohíbnut, rečé Hospóď. I áz ďilá ích i pomyšlénija ích vím i hrjadú sobráti vsjá naródy i jazýki, i prijídut, i úzrjat slávu mojú: I ostávľu na ních známenije, i posľú ot ních spasénych vo jazýki, v Tharsís, i v Fúd, i v Lúd, i v Mosóch, i v Thovéľ, i vo Jelládu, i vo óstrovy dáľnyja, íže ne slýšaša ímene mojehó, nižé víďiša slávu mojú: i vozvisťát slávu mojú vo jazýcich. I privedút brátiju vášu ot vsích jazýk dár Hóspodevi, s kóňmi i kolesnícami i s nosílami mskóv, pod síňmi vo svjatýj hrád Jerusalím, rečé Hospóď: áki by prineslí sýnove Izráilevy žértvy svojá mňí so psalmý v dóm Hospódeň. I ot ťích pojmú sebí žercý i levíty, rečé Hospóď. Jákože bo nébo nóvo, i zemľá nová, jáže áz tvorjú, prebyvájut predo mnóju, hlahólet Hospóď: táko stánet símja váše, i ímja váše. I búdet mísjac ot mísjaca, i subbóta ot subbóty, prijídet vsjáka plóť poklonítisja predo mnóju vo Jerusalím, rečé Hospóď. I izýdut: i úzrjat trúpy čelovíkov prestupívšich mňí, čérv bo ích ne skončájetsja, i óhň ích ne uhásnet, i búdut v pozór vsjákoj plóti.

Prokímen, psalóm 122, hlás 6: Pomíluj nás Hóspodi, pomíluj nás.

Stích: K tebí vozvedóch óči mojí živúščemu na nebesí.

Skóro da predvarját ný ščedróty Tvojá, Hóspodi, jáko obniščáchom ziló. Pomozí nám, Bóže Spáse náš, slávy rádi ímene Tvojehó, Hóspodi, izbávi nás, i očísti hríchí náša, ímene rádi tvojehó.

Svjatýj Bóže, svjatýj krípkij, svjatýj bezsmértnyj, pomíluj nás. (3x)

Sláva Otcú, i Sýnu, i Svjatómu Dúchu.

I nýňi i prísno, i vo víki vikóv, amíň.

Presvjatája Tróice pomíluj nás: Hóspodi, očísti hrichí náša: Vladýko, prostí bezzakónija náša: svjatýj, posití, i iscilí némošči náša, ímene Tvojehó rádi.

Hóspodi, pomíluj. (3x)

Sláva Otcú, i Sýnu, i Svjatómu Dúchu.

I nýňi i prísno, i vo víki vikóv, amíň.

Ótče naš, íže jesí na nebesích, da svjatítsja ímja Tvojé, da priídet cárstvije Tvojé: da búdet vóľa Tvojá, jáko na nebesí i na zemlí. Chľíb náš nasúščnyj dážď nám dnés, i ostávi nám dólhi náša, jákože i mý ostavľájem dolžnikóm nášym: i ne vvedí nás vo iskušénije, no izbávi nás ot lukávaho.

Jeréj: Jáko tvojé jesť cárstvo, i síla, i sláva, Otcá i Sýna, i Svjatáho Dúcha, nýňi, i prísno, i vo víki vikóv.

Amíň.

Troparí, hlás 2.

Spasénije soďílal jesí posreďí zemlí, Christé Bóže, * na kresťí prečísťiji rúci Tvojí prostérl jesí, * sobirája vsjá jazýki, zovúščyja: ** Hóspodi, sláva Tebí.

Sláva:

Prečístomu óbrazu Tvojemú poklaňájemsja, blahíj, * prosjášče proščénija prehrišénij nášich, Christé Bóže: * vóleju bo blahovolíl jesí plótiju vzýti na krést, * da izbáviši, jáže sozdál jesí ot rabóty vrážija. * Ťím blahodárstvenno vopijém Tí: * rádosti ispólnil jesí vsjá, Spáse náš, ** prišédyj spastí mír.

I nýňi: (v poneďiľnik, vtórnik i četvertók)

Milosérdija súšči istóčnik, * mílosti spodóbi nás, Bohoródice, * prízri na ľúdi sohrišívšyja, javí jáko prísno sílu tvojú: * na ťá bo upovájušče, rádujsja vopijém tí, ** jákože inohdá Havrijíl, bezplótnych archistratíh.

I nýňi: (sréda i pjatók) Krestobohoródičen:

Preproslávlena jesí, Bohoródice ďívo, pojém ťá: * krestóm bo sýna tvojehó nizložísja ád, * i smérť umertvísja, umerščvléniji vostáchom i životá spodóbichomsja, * ráj vosprijáchom, drévneje naslaždénije. * Ťím blahodarjášče slavoslóvim, * jáko deržávnaho Christá Bóha nášeho, ** i jedínaho mnohomílostivaho.

Hóspodi, pomíluj. (40x)

Íže na vsjákoje vrémja i na vsjákij čás, na nebesí i na zemlí poklaňájemyj i slávimyj, Bóže blahíj, dolhoterpilívyj i mnohomílostivyj, právednyja ľubjáj, i hríšnyja mílujaj, vsjá zovýj ko spaséniju, obiščánija rádi búduščich bláh: sám, Hóspodi, primí í náša v čás séj molítvy, i isprávi živót náš k zápovidem Tvojím, dúšy náša osvjatí i ťilesá očísti, pomyšlénija isprávi, rázum ucilomúdri i istrézvi, i izbávi nás ot vsjákija skórbi, zól i boľíznej, i ohradí nás svjatými ánhely Tvojími, jáko da opolčénijem ích sobľudájemi i nastavľájemi, dostíhnem v jedínstvo víry, i v rázum neprikosnovénnyja Tvojejá slávy: jáko blahoslovén jesí vo víki vikóv, amíň.

Hóspodi, pomíluj. (3x) Sláva, i nýňi:

Čestňíjšuju Cheruvím i slávňijšuju bez sravnénija Serafím, bez istľínija Bóha Slóva róždšuju súščuju Bohoródicu ťá veličájem.

Ímenem Hóspodnim blahosloví ótče.

Jeréj: Molítvami svjatých otéc nášich, Hóspodi Iisúse Christé Bóže náš, pomíluj nás.

(ášče že ňísť jeréja moľáščasja, hlahólem: Molítvami svjatých otéc nášich, Hóspodi Iisúse Christé Bóže náš, pomíluj nás. )

Lík: Amiň.

Molitva sv. Jefrema:

Jerej: Hóspodi i Vladýko životá mojehó, duch unýnija, nebrežénija, ľubonačálija í prazdnoslóvija otžení ot mené. Poklon dozemnyj.

Duch že cilomúdrija i smirenomúdrija, terpínija í ľubvé dáruj mí nedostójnomu rabú tvojemú. Poklon dozemnyj.

Hóspodi Carjú, dážď mňí zríti mojá sohrišénija i ne osuždáti bráta mojehó, jáko blahoslovén jesí vo víki vikóv, amiň. Poklon dozemnyj.

12 malych poklónov, hlahóľušče na kíjždo poklón:

Bóže, mílostiv búdi mňi hríšnomu.

Bóže, očísti hrichí moja i pomíluj mjá.

Bez čislá sohriších, Hóspodi, prostí mjá.

i páki: Hóspodi i Vladýko životá mojehó, duch unýnija, nebrežénija, ľubonačálija í prazdnoslóvija otžení ot mené. Duch že cilomúdrija i smirenomúdrija, terpínija í ľubvé dáruj mí nedostójnomu rabú tvojemú. Hóspodi Carjú, dážď mňí zríti mojá sohrišénija i ne osuždáti bráta mojehó, jáko blahoslovén jesí vo víki vikóv, amiň. Poklon dozemnyj.

Táže:

Svjatýj Bóže, svjatýj krípkij, svjatýj bezsmértnyj, pomíluj nás. (3x)

Sláva Otcú, i Sýnu, i Svjatómu Dúchu.

I nýňi i prísno, i vo víki vikóv, amíň.

Presvjatája Tróice pomíluj nás: Hóspodi, očísti hrichí náša: Vladýko, prostí bezzakónija náša: svjatýj, posití, i iscilí némošči náša, ímene Tvojehó rádi.

Hóspodi, pomíluj. (3x)

Sláva Otcú, i Sýnu, i Svjatómu Dúchu.

I nýňi i prísno, i vo víki vikóv, amíň.

Ótče naš, íže jesí na nebesích, da svjatítsja ímja Tvojé, da priídet cárstvije Tvojé: da búdet vóľa Tvojá, jáko na nebesí i na zemlí. Chľíb náš nasúščnyj dážď nám dnés, i ostávi nám dólhi náša, jákože i mý ostavľájem dolžnikóm nášym: i ne vvedí nás vo iskušénije, no izbávi nás ot lukávaho.

Jeréj: Jáko tvojé jesť cárstvo, i síla, i sláva, Otcá i Sýna, i Svjatáho Dúcha, nýňi, i prísno, i vo víki vikóv.

Amíň.

Hospodi pomíluj. (12x)

Posém molítvu sijú:

Bóže i Hóspodi síl, i vsejá tvári soďíteľu, íže za milosérdije neizrečénnyja mílosti tvojejá, jedinoródnaho Sýna tvojehó, Hóspoda nášeho Isúsa Christá, nizposlávyj na spasénije róda nášeho: i čestným jehó krestóm, rukopisánije hrích nášich rasterzávyj, í pobidívyj ťím načála, i vlá­sti tmý: sám Vladýko čelovikoľúbče, prijmí i nás hríšnych blahodárstvennyja sijá í molébnyja molítvy, i izbávi nás ot vsjákaho vsehubíteľnaho, i mráčnaho hrichopadénija, í vsích ozlóbiti nás íščuščich vídimych í nevídimych vráh, prihvozdí stráchu tvojemú plóti náša, í ne ukloní serdéc nášich v slovesá ilí pomyšlénija lukávstvija, no ľubóviju tvojéju ujazví dúšy náša, da k tebí vsehdá vzirájušče, i jéže ot tebé svítom nastavľájemi, tebé nepristúpnaho i prisnosúščnaho zrjášče svíta, neprestánnoje tebí ispovídanije, í blahodarénije vozsylájem, beznačáľnomu Otcú, so jedinoródnym tvojím Sýnom, i vsesvjatým i blahím, i životvorjáščim tvojím Dúchom, nýňi i prísno, i vo víki vikóv, amíň.

Jeréj: Sláva tebi, Christé Bóže, upovánije náše, sláva tebí.

Lík: Sláva Otcú, i Sýnu, i svjatómu Dúchu, i nýňi i prísno, i vo víki vikóv. Amíň. Hóspodi, pomíluj. (3x) Blahosloví.

Jeréj: Christós ístinnyj Bóh náš, molítvami prečístyja svojejá Mátere, prepodóbnych i bohonósnych otéc nášich i vsích svjatých, pomílujet i spasét nás, jáko bláh i čelovikoľúbec.

Lík: Amíň.

Ášče mírjan molítsja, hlahólet tókmo: Čestňíjšuju Cheruvím: Sláva, i nýňi: Hóspodi, pomíluj (3x) Hóspodi, blahosloví. Molítvami svjatých otéc nášich, Hóspodi Iisúse Christé Bóže náš, pomíluj nás. Amíň.

Ornament